شاهد.. فيديو كليب "ناسي كل حاجة " لـ أمير عيد
طرح الفنان أمير عيد، أحدث أغاني ألبومه الجديد "Roxi"، عبر قناته الرسمية على موقع "يوتيوب"، والتي جاءت تحت عنوان "ناسي كل حاجة"، وجاءت الكلمات كالتالي:
وحدي ماشي في الشوارع
رايح فين أنا مش عارف
يمكن بجري ورا بكرة
ويمكن بجري من امبارح
سارح بهرب من الدنيا الحقيقية
أو خايف هي الكلمة الأدق
يجرى إيه لو عيشنا جوة فيلم أو أغنية
وحياتي بتقولي خلص مفيش وقت
بيمد العمر بسرعة وبيجري بيا
وأنا من جوايا لسة عيل مش مستعد
مش عارف ليه الناس كلها مثالية
متأكدين من كل حاجة مفيش شك
بفكر فيكي وساعات بحن
مش لاقي أي حلم يصحيني
مش مهم، مش مهتم
سادد وداني ومغمض عيني
أنا ناسي كل حاجة بس فاكرك
بروح نفس الأماكن يمكن أقابلك
ساعات بخاف تكوني من خيالي
مش قادر أرجع تاني لحياتي قبلك
عايش أنا جوايا مفيش حد معايا
رغم الناس حواليا كتير أنا وحيد
بكتب حكاية ولسه واقف في البداية
الورقة بيضا لكن فيها شخابيط
فيها رسمة لمكان أحلى
وفيها قهوة وقعت مني وأنا سارح
وفيها عينيكي مرسومة لكن مش واضحة
بحاول أفتكر كل الملامح
مسامح نفسي على عمر معشتهوش
على قلب خاف يدق طول حياته
على كل سؤال مسألتهوش
أكتر شيء مخيف هو الخوف ذاته
أنا ناسي كل حاجة بس فاكرك
بروح نفس الأماكن يمكن أقابلك
ساعات بخاف تكوني من خيالي
مش قادر أرجع تاني لحياتي قبلك.
ومن المقرر أن يصدر أمير عيد ألبوم Roxi بشكل منفرد ويطرح أغانيه التي يصل عددها إلى 5 أغاني على فصول متسلسلة حيث يحكي كل فصل قصة، يكملها الفصل الذي يليه.
والألبوم له طابع فترة الخمسينات والستينات، ومن إنتاج شركة Sony Music Entertainment Middle East.
وكان الجمهور قد تساءل عن ماهية العمل الفني الجديد الذي روج له "عيد" منذ أيام، وخمن أنه قد يكون ألبوم غنائي أو فيلم سينمائي، وبذلك يتضح أن Roxi أحدث ألبومات أمير الغنائية.
يذكر أن أمير عيد كان قد روج لأحدث أعماله الفنية، بعنوان Roxi، وطرح "عيد" عبر حسابه الشخصي على موقع تبادل الصور والفيديوهات إنستجرام، البوستر الترويجي للعمل، وظهر خلاله بإطلالة كلاسيكية قديمة مع ندى أبادير، وعلق: "Roxi
17-7-2024".