قبل نتيجة الثانوية العامة.. محمود سعد يوجه نصائح لأولياء الأمور
وجه الإعلامي محمود سعد، عدة نصائح لأولياء الأمور قبل ساعات من ظهور نتيجة الثانوية العامة لعام 2024، مؤكدا أن المجموع الصغير ليس بنهاية العالم.
نشر "سعد" فيديو عبر حسابه بموقع تبادل الصور والفيديوهات "إنستجرام"، وقال خلاله: "جبت 56% وأحمد حلمي 50%، الثانوية العامة لا أول الطريق ولا آخره.. الثانوية العامة مش آخر الدنيا يا جماعة، وياما ناس جابوا مجاميع صغيرة وحققوا نجاحات كبيرة جدا، والأمثلة كتير وموجودة معانا".
تابع: "ابنك لما يجيب مجموع صغير مش نهاية العالم، ولما مينجحش مش نهاية العالم.. أنا نجحت أنا وصحابي حوالي 20 واحد، الدولة عملت اوكازيون ونجحنا كلنا، وانا امتحنتها سنة واحدة، وغيري امتحنوها 3 و4 سنيين، ومع ذلك حققوا نجاحات كويسة جدا في حياتهم".
أشار: "كلنا عارفين أن المجاميع الكبيرة بتدخل كليات زي الطب والهندسة والاقتصاد والعلوم السياسية، وفي الآخر ممكن ميحققوش نجاحات أو يبقى أماكن متواضعة، وفي ناس تانية ممكن متنجحش في الثانوية أو متاخدهاش من الأساس وتحقق نجاح كبير، على سبيل المثال الشاب اللي عمل مشروع الفراخ السوداء".
أكد: "مش كل إنسان مؤهل إنه يكون متفوق في الدرجات، لا ممكن يكون متفوق في حاجات تانية كتير، وعلى سبيل المثال أنا جبت 56%، ودخلت كلية آداب قسم تاريخ، واشتغلت في الصحافة ومكنتش أعرف إني هنجح فيها".
استكمل: "بص على الممثلين ومجاميعهم في الثانوية، فمثلا أحمد حلمي جاب 50%، ومبقاش ممثل ناجح وبس، بل بقى ممثل مثقف وواعي، وغيره كتير".
أردف: "دي وسمة عار في الأمة، كونهم مش بيبذلوا مجهود مع أولادهم يعرفوا هم بيحبوا إيه، ويتشغلوا على كده وينموه، بنتك شاطرة في الطبخ مثلا نمي مهاراتها هتبقى شيف كويس جدا.. بالراحة شوية على نفسنا، والثانوية العامة مش هي نهاية الطريق ولا حتى بداية الطريق".
نرشح لك: ترقبوها.. رابط نتيجة الثانوية العامة 2024
كانت وزارة التربية والتعليم والتعليم الفني، أعلنت عن عقد المؤتمر الصحفي الخاص بإعلان نتيجة امتحانات إتمام شهادة الثانوية العامة بحضور محمد عبد اللطيف وزير التربية والتعليم والتعليم الفنى غدا الثلاثاء في تمام الساعة 12 ظهرا بالمدينة التعليمية بمدينة 6 أكتوبر.