كلمات أغنية "الدنيا قاسية" لـ عصام صاصا
طرح مطرب المهرجانات عصام صاصا، أغنية جديدة عبر قناته الرسمية على يوتيوب، وذلك على الرغم من حبسه.
الأغنية تحمل اسم "الدنيا قاسية"، من كلمات مصطفى الجن وألحان كيمو الديب.
وجاءت كلمات الأغنية كالتالي:
الدنيا قاسيه اتشقلبت بيا فى ثوانى
فتحت عينى لقيتنى فجأة فى دنيا تانى
وحشتنى نفسى واهلى واخواتى و مكانى
هوون يارب الغربه صعبه مموتانى
ربنا علشان عالم بيا
مش هيشمتكم يوم فيا
قادر ياكريم تسمع ليا
وتنجينى
انا عارف انك مش هتسبنى
وبلاك معناه ان انت حاببنى
دانا طوب الارض بيحاربنى
طالع عينى
اه من الحياه بقا كل دا كان مستخبى
انا مش بخير والصدمه هتوقفلى قلبى
غرقان فى بحر دموع مفيش ولا حد جمبى
مبقاش خلاص بأيديا غير انى ادعى ربى
مش عارف انام من تفكيرى
ولا حتى بقرب لسريرى
مظلوم ولا عارف ايه مصيرى
نفسى نسيتها
مصدوم من كتر اللى حصلى
واللى انا بسمعو وبيوصلى
حد يفهمنى يفسرلى
ايه اخرتها
العجل لما يقع بتكتر سكاكينو
وكأنهم كانو بالسلاح مستنينو
الغدارين متحولين لكلاب مالينو
سانين سنانهم ليل نهار ومقطعينو
كلو بينهش مين بيسمى
عايزين ياكلونى وانا متغمى
شايفننى وانا بينزف دمى
ومش راحمننى
بالحياه لو طالو يدفنونى
من بكره فى تربه هيرمونى
ويجيبو صوان و يعزونى
الله يعيننى
فارقنى ابويا وسابلى كوم لحم فى رقبتى
من يومها انا اتيتمت و معشتش طفولتى
واخدننى بالظاهر ومش عارفين حقيقتى
بسبب عنيكو على النجاح بدفع ضريبتى
انا قصه الناس بتألفها
دايره بتتكلم على كيفها
هى الكواليس مين بيشوفها
اه ياحول الله
بيقولو اشهر شاب فى مصر
ومحقق احلام العصر
عامل ملايين و صاحب قصر
ولعانه معاه
معايا كام معايا رب اسمو الوكيل
فوضت امرى اليه وبحالى صبح كفيل
اللى معاه ربه مفيش فى سكتو مستحيل
قادر يذيح الهم والحمل التقيل
كانت محكمة جنايات الجيزة، قضت بالحبس على مطرب المهرجانات عصام صاصا 6 أشهر مع الشغل، بتهمة القيادة تحت تأثير المخدرات وحيازة مواد مخدرة بتهمة التعاطي، وانقضاء الدعوى بالتصالح في واقعة القتل الخطأ.
كانت الأجهزة الأمنية في دولة الإمارات بالتنسيق مع الانتربول المصري، قد ألقت القبض على مطرب المهرجانات عصام صاصا، والمُدرج على قوائم الترقب والوصول لإدانته في تعاطي المواد المخدرة في قضية دهس شخص.