ميدو لـ مجلس إدارة الزمالك: التخطيط في المكتب قبل الملعب
وجه أحمد حسام ميدو، نجم الزمالك ومنتخب مصر السابق رسالة لمجلس إدارة ناديه، بعد خروج الفريق من منافسات كأس مصر، وعدم حصوله على أية بطولات على مدار الموسم الرياضي الحالي.
قال ميدو، في لايف على حسابه الرسمي على "إنستجرام" إن الجمهور غاضب وبشدة، ولكن ليس بسبب الخسارة إنما بسبب الأخطاء الكثيرة التي يراها بعينه من مجلس الإدارة الذي تحمس له نظرًا لأن أغلب أعضاءه رجال أعمال ناجحين، ومنهم من لديهم بجانب الخبرة الإدارية الخبرة الرياضية الكافية التي تساهم في الارتقاء بالفريق.
أوضح ميدو: "الزمالك برغم كل اللي مر بيه السنادي لا يستحق أي بطولة محلية، الزمالك للأسف عمل كل الأخطاء الممكنة عشان يطلع من كل البطولات المحلية وفاز بالكونفدرالية بس كنا عارفين إنهم هيفوزوا لأنهم أقوى فرقة".
أضاف: "احنا نهاية موسم ووقت قصير جدا على بداية الموسم الجديد ومجلس إدارة الزمالك عليه عمل كبير لازم يشتغل بسرعة على تصحيح الأخطاء اللي وقع فيها مجلس الإدارة منذ توليه المسؤولية".
أردف: "جمهور الزمالك غير راضي وغضبان جدا لأنه شايف أخطاء قدام عنيه بتحصل وواضحة للجميع، وخلينا نسميها أخطاء فنية لكن هي في الأساس إدارية".
تابع: "أنا مريت بظروق مشابهة إني اتخذت قرار في 2014 وكنت 30 سنة اني هكمل الكاس بالشباب مع 2 و 3 كبار هيموتوا نفسهم في الملعب عشان النادي، وواحد من أعضاء مجلس الإدارة قالي أنت مجنون وبتخلص على الزمالك وقلتله هناخد الكاس وفعلا ربنا كرمنا".
استطرد حديثه قائلًا: "في أخطاء فنية كبيرة جدا جدا حصلت، أخطاء إدارية، على الرغم من إن المجلس متفق ومفيش بينهم اختلاف كبير ودي نعمة كبيرة، وهما وعدوا إنهم هيعملوا هيكلة إدارية محترمة لقطاع الكرة في النادي ومحصلش، وكلنا كزملكاوية كنا متحمسيش بشكل كبير جدا للمجلس ده".
ووجه أحمد حسام ميدو نصيحة لمجلس إدارة الزمالك قال فيها: "أهم حاجة أجيب مدير رياضي محترف على رأس الفريق دارس واشتغل الشغلانة وعارف يعني ايه يكون فريق ويشتغل مع المدرب".
أضاف: "أكتر حاجة توقعناها أن يكون في تشكيل وشغل احترافي لقطاع الكرة في نادي الزمالك الجمهور زعلان من ده مش إننا مجبناش بطولة، محتاجين مدير رياضي للنادي إزاي مفيش مدير رياضي".
وشدد على كلامه قائلًا: "لازم مجلس الإدارة يشتغل على تصحيح الأخطاء والتركيز على الاحتياجات اللي الفريق عايزها عشان رسالة أخيرة ليهم: "جمهور الزمالك مش هيقبل بموسم تاني زي ده لازم يتم التخطيط للموسم الجاي قبل ما يتبدأ في المكتب قبل المعلب".