محمد التاجي: تمنيت المشاركة في "العتاولة" وكان هناك تحفظات على دوري

تحدث الفنان محمد التاجي، عن آخر أدواره، والذي قدمه في الموسم الرمضاني الفائت 2024، في مسلسل "العتاولة"، مع الفنان أحمد السقا والفنان طارق لطفي.

قال محمد التاجي خلال لقائه في البرنامج الإذاعي "عيش صباحك" والذي يذاع عبر إذاعة "نجوم إف أم": "قرأت خبر هذا المسلسل وشوفت الكاست الموجود، أحمد السقا، وطارق لطفي، وزينة، وباسم سمرة، وصلاح عبدالله، فقولت الله الكاست ده حلو أوي لو الواحد وسطيهم هيكسر الدنيا، وبعدها 48 ساعة كلموني عشان ابقى معاهم".

وأضاف التاجي: "مترددتش دقيقة ووافقت، لأن الواحد ما بيصدق يشبط في حاجة جديدة معملهاش وخصوصا لو شافها في الحقيقة، لأن أنا بيت ابويا كان في وسط البلد وكنت بشوف الراجل الكبير اللي بيعاكس البنات الصغيرين، والناس لما شافوا الدور ده عرفوه وقالولي ده فلان".

وتابع: "كنت آخر واحد مضى وسط كاست المسلسل لأن شركة الإنتاج كان عندها تحفظ على الدور ده، وصادق صباح المنتج صارحني بده، لأن دوري كان ترشيحا من المخرج أحمد خالد موسى، وبعد أول مشهدين عجبهم الدور".

وعن دراسته لتلك الشخصية وكيفية إظهارها للجمهور بهذا الشكل، قال: "التمثيل زي البازل، كله مواقف وشخصيات بتدينا خلفية مرجعية للأدوار، والبوستيجة اللي كنت مركبها، كانت من واحد بيعمل أدوار صغيرة زمان في السينما، وكان شعره 7 فتلات ولما بعته للمخرج شبط وعملناه".

واختتم حديثه: "مبعرفش أتوقع رد الفعل هيكون جي ازاي من الناس لأن دي حاجة بتاعت ربنا، أنا مش بتفرج على الأدوار اللي بعملها خلال التصوير، وبكتفي بالمشاهدة لما تخلص".