محمد التاجي: أرفض المشاركة في أفلام "السوبرجيت"!
استنكر الفنان محمد التاجي تصرف بعض الفنانين الذين يتعمدون إفساد مشاهد زملائهم في العمل، وعدم مساعدة الوجوه الجديدة ، موضحا أن هذا عكس سلوك الفنانين في الأجيال السابقة.
قال "التاجي" في تصريحات لبرنامج "عيش صباحك" مع يوسف التهامي وفانا إمام على"نجوم إف إم": "كل عصر فيه الصالح والطالح ولكن كان في احترام للفنانين ما بين بعضهم وكانت بتاخد بإيدي الوجوه الجديدة".
تابع: "اشتغلت مع فنانين زي أستاذ نور الشريف ومحمود عبد العزيز ومحمود ياسين ونبيلة عبيد وفاتن حمامة وسعاد حسني وكانوا بياخدوا بإيدينا في العمل".
وعن الفنان نور الشريف والفنانة سعاد حسني، قال: "أستاذ نور الشريف في اللوكيشن كان بيعلمك ويفهمك الدنيا ماشيه ازاي لأنه مهما كنت دارس مش هتبقى فاهم في البلاتوه الدنيا ماشيه ازاي، والفنانة سعاد حسني كمان شوفت ده بعيني في فيلم (شفيقة ومتولي) كانوا بيوقفوها في الخلفية عشان مشهد طويل لحد من زمايلها مش ليها، وكانت واقفة وبيظبطوا عليها الإضاءة وهي عادي متقبلة".
وعلق على الجيل الحالي، قائلا: "الأجيال دي معندهمش ثقة بالنفس، عشان تساعد الناس اللي طالعة، وفي ممثلين بيقعدوا على المونتاج عشان يبوظوا لزمايلهم شغلهم، والمخرج بيكون ضعيف الشخصية، وأعرف ممثل قعد مخرج 15 يوم في البيت، قاله تقعد في بيتكم وهو اللي منتج وأخرج كل حاجة، إحنا أتربينا على أن المخرج رب العمل".
في سياق آخر، قال الفنان محمد التاجي: "فيه مسلسل مؤجل مش عارف هنبدأ امتى.. وأنا اليومين دول عمال أرفض أعمال عشان فيه أعمال عيب إني أعملها ورجعنا تاني لأفلام المقاولات أو أفلام الميكروباصات والسوبر جيت".
تابع: "في الثمانينات كان الفيلم المقاولات بياخد أسبوع واحد وفيه فنانين كونت مسيرتها كلها على الأفلام دي، ولكن في نجوم كبار كانوا شايلين الأفلام دي ولكن دلوقتي مين دول؟!".