عبير عبد الرحمن: أعلى راتب حصلت عليه 1500 جنيه

تحدثت عبير عبد الرحمن البطلة الأولمبية في رفع الأثقال، عن أبرز كواليس اتحادات الألعاب ورأيها في أداء اللجنة المصرية الأولمبية خلال دورة الألعاب الأولمبية "باريس 2024".

قالت "عبد الرحمن" خلال ضيافتها في حلقة بودكاست "النقطة العميا" الذي يقدمه الإعلامي محمد الدسوقي: "أن مشاكل زمان تقريبا هي هي نفس مشاكل دلوقتي، ومكنش في اهتمامات من الجانب المادي ولا المعنوي من الاتحاد، وكان الاهتمام باللاعبين الكبار أو المشهورين، وسايبين الصغيرين والفريق الاحتياطي بدون دعم".

نرشح لك: إبراهيم عبد الجواد ضيف مها بهنسي على "CBC"

أكدت: "ولما كنا بنعسكر بنروح نتمرن في خيم والجو يمطر والخيمة تطير ونرجع نركبها تاني".

وعن رواتب اللاعبين في الاتحادات ردت قائلة: "أعلى راتب خدته كان 1500 جنيه سنة 2012، وده أعلى راتب في الاتحاد، وقبل الميدالية كانت 1000 جنيه، ومكنش معانا زمان مسئول تغذية بس دلوقتي موجود".

وحول مشكلة الميزان التي ارتبطت بـ "يمنى عياد" لاعبة المنتخب المصري للملاكمة، قالت: "كان لازم توزن على ميزان البطولة لأن الميزان اللي معاها مكنش مضبوط، وده يرجع لقلة خبراتها بس لازم يكون في توجيه من المدرب ورئيس الاتحاد، وده لازم يكون في كل الألعاب مش لعبتها بس".

اختتمت حديثها عن دور اللجنة الأولمبية: "مستغربة إن البعثة المصرية في أولمبياد باريس تكون 164 لاعب ولاعبة ونجيب 3 ميداليات، أنا مش بقلل من اللاعبية، الموضوع مش أكبر بعثة مصرية مسافرة، الدول التانية بتسعى إنها تجيب ميدالية أولمبية ومش بتسفر أكبر بعثة زينا كده، إحنا عايزين نبقى فخورين بأكبر عدد ميداليات".

والجدير بالذكر، أن عبير عبد الرحمن فازت بميداليتين أوليمبيتين في دورتي ألعاب بكين 2008 (البرونزية) ولندن 2012 (الفضية)، وذلك بعد احتلالها للمركز الخامس في الدورتين، وبعد اكتشاف اللجنة لتعاطي الفائزين في المراكز المتقدمة للمنشطات لتحصل فيما بعد على المركزي الثاني في دورة لندن، والثالث في دورة بكين.