رد محمد أبو بكر على متصلة تريد تعقيم قطتها

رد الشيخ محمد أبو بكر على سؤال متصلة تريد تعقيم قطتها التي تربيها في المنزل، موضحا رأيه في الأمر.

قال "أبو بكر" في برنامج "إني قريب" عبر شاشة النهار: "حد قالك إن فيه ناس في غزة والصومال مش لاقية تاكل وبتموت؟ حد قالك إن فيه في مصر ناس بتموت مش لاقية الدوا، وإن لاقيته ماتلاقيش الغدا والكساء والناس بتكلم نفسها علشان دخول المدارس؟".

استكمل: "الله يعينهم ويعينك على نفسك، القطة اللي عندك دي حرام تصرفي عليها جنيه"، وردت عليه المتصلة: "أومال ارميها في الشارع ده مش حرام؟"

أوضح "أبو بكر": "النبي صلى الله عليه وسلم قال لا هي تركتها تأكل من خشاش الأرض، ارحمي الحيوان وارفقي واعتني بيه، ولكن حرام تصرفي عليها جنيه علشان تعقميها أو حتى تلقحيها علشان تخلف لأن هناك من هو أولى بهذا الجنيه، دي مكانها مش البيت، لترد المتصلة: "ما هي لو اترمت في الشارع هتموت".

استكمل: "هو أصلا ربنا خلق القطط في البيت ولا في الشارع؟"، أجابته المتصلة: "مش كلهم".

أكد محمد أبو بكر: "الحديث تركتها تأكل من خشاش الأرض ولا تأكل من بيتنا؟ الأرض.. يبقى أصل القطة موجودة في الشارع.. أنتي ربنا أكرمك ووضع في قلبك الحنية ودخلتيها البيت واسألي نفسك بتصرفي عليها كام.. إحنا منعملهاش لا تعقيم ولا الكلام ده حرام، حرام الجنيه يتصرف عليها، فضلا إن ربنا جعلها علشان تتناسل ولا علشان أنتي تغيري خلق الله وتعقميها؟، ردت المتصلة: "لاء تتناسل، بس هي لو اترمت في الشارع هتموت".

نرشح لك: حسن مكاوي: مبادرة التنظيم الذاتي هدفها ضمان الحرية للإعلامي

أردف أبو بكر: "أنا مبقولكيش ارميها في الشارع دلوقتي، أنتي الله يجزيكِ الخير على أن وضعت في قلبك الرحمة وأكرمتي الحيوان ومش هقولك بتصرفي عليها كام علشان أنا واثق إنك بتصرفي عليها في الشهر بيعدي 3 أو 4 آلاف جنيه، صح؟"، قالت المتصلة: "لاء مش للدرجة دي".

اختتم: "ارحميها وارفقي بيها دون أن تبذري في الرحمة والإنفاق، ولا يجوز تعقميها، أنا مقولتش ترميها في الشارع، ومقولتش حرام إنها تربيها إنما فيه أصل، الأصل إن هي في الشارع مش البيت، أنتوا دخلتوها البيت وصرفتوا عليها، هل التعقيم ده من لوازم سلالة البيت؟ لا.. يبقى لا يجوز التعقيم لأن أولا تغيير لخلق الله فضلا عن أنه تبذير من وجهة نظري في الإنفاق على الحيوان".