"ولا تنسوا الفضل بينكم.. محمد سامي يوجه رسالة مؤثرة لـ تامر حسني
عبّر المخرج محمد سامي عن امتنانه الكبير لصديقه الفنان تامر حسني، الذي كان له دور كبير في نجاحاته.
قال "سامي" عبر حسابه على موقع تبادل الصور والفيديوهات "إنستجرام": "(وَلَا تَنْسَوُا الْفَضْلَ بَيْنَكُمْ) وأنا قاعد إمبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسة ويحقق أحلامه، فطبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدملي كل الدعم والحب والإمكانيات اللي خلتني أثبت نفسي".
نرشح لك: سبب اعتذار شذى لـ تامر حسني
أضاف: "وبالذات في وقت كان صعب الشباب ياخد في الدراما فرصة بحجم مسلسل آدم، فاكر إن الكل كان رافض إني آخد الفرصة دي ومستكبرينها عليا إلا هو، وقف في ظهري كأنه بيحارب لأخوه وبصلي مرة والظروف كلها ضدي وكنت حاسس وأنا بحضر أنهم هيجيبوا حد غيري وقالي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقولي مسلسلك كأني عامل تسع مسلسلات قبله تحسس الواحد بنفسه وأهميته".
استكمل: "أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".
يذكر أن مسلسل "آدم" قدمه تامر حسني عام 2011 بالتعاون مع المخرج محمد سامي. من بطولة تامر حسني ودرة ومي عز الدين وأحمد زاهر وعفاف شعيب وماجد المصري، وآخرين. من تأليف أحمد محمود أبو زيد.