في عيد ميلاده الـ 40.. إبراهيم فايق: مش هنكر خضتي

احتفل الإعلامي إبراهيم فايق بعيد ميلاده الـ 40، مؤكدا على أنه كان يرى أن سن الأربعين رقم كبير من الصعب الوصول له.

نشر "فايق" صورة له عبر حسابه الرسمي على موقع "إنستجرام" وعلق عليها: "اللهم لك الحمد والشكر 40 سنة مرحلة جديدة في عمري، عداد جديد بيشوف أرقام ناحية الشمال كلها 4، أرقام بتطالبني إني أحاسب نفسي وأراقبها علشان أبقى أفضل نسخة من نفسي، وعلشان مفيش أعذار، ده سن النضج والهدوء واكتمال الشخصية".

أكمل: "فضل ربنا عليا عظيم كرمني بعطفه وشملني برحمته لمست السما بإيدي في لحظات من الفرحة واتهبدت على الأرض واتكسر خاطري في لحظات من الحزن، رضيت بكل مراحل حياتي وسلمت أمري لله وتركت له التدبير وشغلت نفسي بمهمة السعي فقط فكانت النتائج أعظم بكتير من أحلامي".

أردف: "40 سنة ولسة الشغف جوايا للنجاح بنفس طاقة العيل اللي لسه بيحلم يحقق ذاته، 40 سنة ولسة بعافر وهعافر علشان أتعلم أكتر وأفهم أكتر، 40 سنة ولسة عايز أشتغل زيادة على عيوبي وأشتغل أكتر على نفسي".

أضاف: "40 سنة مش هنكر خضتي من الرقم، أنا كنت بشوفهم زمان ناس كبيرة بس الدور جه عليا فجأة وأنا لسة ماسك في إيدي دراع الأتاري، جايز اللي فات مش قد اللي جاي بس السيرة أطول من اللي فات واللي جاي بإذن الله".