بعد الهجوم عليه بسبب ابنته.. خالد الجندي يدافع عن رمضان عبد الرازق

علق الشيخ خالد الجندي على الهجوم الذي تعرض له الشيخ رمضان عبد الرازق بسبب ظهور ابنته في عقد قرانها ويظهر جزء من شعرها.

قال "الجندي" في برنامج "لعلهم يفقهون" المذاع على شاشة dmc، إن الأجواء كانت مليئة بالسعادة والفرح، مضيفا: "لكن غربان الشجرة والبوم الذي ينعق في حياتنا بالهم والغم والأحزان، أصحاب اللجان اللي بتتصيد وتترصد، عندنا اتنين أعداء، جماعة الإسلام السياسي، والملحدين اللي عايزين يسقطوا الدين عن طريق الطعن في ثوابت الدين أو الطعن في علماء الدين".

تابع: "إحنا شايفين حملة ممنهجة للاغتيال المعنوي لكل الرموز الدينية والعلماء.. اللي حصل إن بنت فضيلة الشيخ رمضان مالتزمتش بلبس الحجاب الشرعي اللي هو لا يظهر من المرأة فيه غير الوجه والكفين والصور بينت إن كان فيه كذا خصلة من شعرها باينة من الطرحة اللي كانت لابساها، هي كانت لابسة نص حجاب، معندناش إحنا نص حجاب ولا ربع ولا تلت، يا حجاب يا مفيش حجاب".

استكمل: "الحجاب فريضة واللي يقول غير كده يبقى مخرف ولازم العلماء والناس وكل ولي أمر يقولوا لبعض ده، وهستعين بمقولة الشيخ رمضان اللي مايعلقش على لبس مراته مايبقاش راجل، لكنه مقالش اللي مايدبحش ومايضربش ومايجلدش مراته مايبقاش راجل.. يعلق يعني يقول رأيه وبعدين نشوف ونبدأ بالأنبياء، هل النبي دوره سيطرة ولا أمر ونهي؟ دوره أمر بالمعروف والنهي عن المنكر، إنما النبي يقدر يجيب السيف ويرغم حد بيه؟".

نرشح لك: ممارسة الملاكمة وارتداء الحماة فستان زفاف.. أحدث تقاليع الأفراح

أردف: "كل واحد حر في اختياراته، دورك كأب وزوج إنك تأمر وتنهى وتنصح وتبين فقط، إنما ترغم لاء، أنا بسأل السادة الشماليل اللي بيهاجموا الشيخ رمضان، هقولهم يا ملائكة السوشيال ميديا ياللي بتقولوا الشيخ رمضان يقول ما لا يفعل، هو عمل إيه؟".

اختتم: "قول بنته اللي فعلت وهي اختارت عدم الحجاب، هنقول عليها ليست محجبة، علشان مقولكش نص وتلت حجاب وتفهم غلط، هل الشيخ يسأل لو بنته مش محجبة؟ هل الشيخ يغير دينه والأمر بالمعروف والنهي عن المنكر علشان بنته ماسمعتش الكلام؟ هل بنت الشيخ مطالبة أنها تكون شيخ؟ جرالكم إيه؟ هتنساقوا ورا مجموعة من الرعاع المتخلفين؟".