بيان من بـ لبن بشأن تسمية "لهاليبو يح يح"

أصدرت مجموعة محال "بـ لبن" بيان بشأن تسمية إحدى منتجاته بـ "لهاليبو يح يح"، وهو الاسم الذي أثار الجدل.

جاء البيان الذي كتب عبر حساب "بـ لبن" الرسمي على موقع التواصل الاجتماعي"فيسبوك" : "بخصوص موضوع (لهاليبو يح يح)، والله كنا هنكتب بيان بخصوص موضوع الأسامي اللي منتشر بقاله يومين وبغض النظر بقى هي حملة ممنهجة ولا صدفة حبينا نقول كلمتين، أولاً الحمد لله رب العالمين على النعمة الكبيرة اللي احنا فيها وتوفيق ربنا الكبير لينا في كل الدول العربية اللي فتحنا فيها واللي كنا وجهة مشرفة فيها وبنفخر إننا براند مصري بنسبة 100%".

أكمل البيان: "ثانياً إحنا محل حلويات يا جماعة يعني الموضوع في الحقيقة بسيط جداً بس عشان النجاح والفروع الكتير فتلاقي الكلام عننا كتير الحمد لله لكن لما تلاقي مطعم عنده فرع ولا اتنين مسمي سندوتش (الفياجرا) ده اللي عادي خالص طبعاً ومفيهوش افساد للذوق العام وحضرتك بتروح تطلبه عادي".

أضاف: "ثالثاً الأسامي عندنا من باب التهريج البحت ومعظمها بيكون صدف مرتبطة بحاجات حصلت أثناء التجارب، من وجهة نظرنا اللي ممكن متكونش مقنعة بالنسبالك مثلاً فكرة اسم المنتج اللي عليه الضجة كان هيتسمى لهاليبو بس في الأول على أساس إن العجين سخن من بره وده مش العادي في الآيس كريم بعد كده اتضاف كلمة يح يح على أساس إنه ساقع من جوه، وفعلا الموضوع بالنسبالنا كان تهريج تماماً مش مقصود بيه أي حاجة كنا شايفينه اسم مضحك افيه زي قوليلي يا محاميحو كده".

اختتم البيان: "رابعاً بجد كل اللي بيحصل وبنشوفه في التلفزيون وعلى النت وأسامي منتجاتنا هي اللي بتفسد الذوق العام، أسامي منتجاتنا عاملة أزمة أخلاقية لدرجة إنك بتدعو لمقاطعة مكان أكل عيش له أكتر من 70 فرع في مصر وبيشتغل فيه أكتر من 20 ألف أسرة، كان ممكن تكتفي إنك متطلبش المنتج بس لأن في حاجات أخلاقية كتير قوي محتاجين نتكلم فيها أهم من اسم منتج آيس كريم في السوق مش علي هواك، ومن النهاردة قررنا تغيير اسم المنتج خالص لأي اسم يرضي الجميع".