الرومانسية بتقلب كوميديا.. مواقف طريفة لـ أوس أوس مع الحب

روى الفنان محمد أسامة الشهير بـ"أوس أوس" مواقف طريفة تعرض لها مع قصص الحب التي عاشها بسبب خجله، وعدم قدرته على الاعتراف المباشر بالحب.

وقال خلال حلوله ضيفًا على الإعلامي إبراهيم فايق في بودكاست "فايق ورايق" المذاع على "اليوتيوب": "أنا إنسان رومانسي أوي ميبنش على وشي بس من جوايا رومانسي. وكنت بحب جدًا من طرف واحد لأني كنت ببتكسف أتكلم". مشيرًا إلى أنه كان يحب منذ كان طفلًا لكنها كلها قصص حب من طرف واحد لم يعترف للطرف الآخر بأي منها.

وعن أول موقف حاول الاعتراف بحبه وهو طفل، قال: "وأنا صغير كتبت على ربع جنيه لبنت أنا بحبك وحطيتها في شنطتها وجريت، لقيت الناس بتجري ورايا الناس افتكرت إني سرقت حاجة من شنطتها جروا ورايا".

أما المرة الأولى التي يعترف بها شفهيًا ويتجرأ على المواجهة فكانت في الثانوية العامة، حيث استعاد ذكرياته قائلًا: "أول مرة اتكلم كنت في الثانوية العامة، قلت لبنت بحبك.. سنتين أقولها بحبك وهي تضحك بس افتكرتها خرسة. فاتفقت مع 2 صحابي يعاكسوها وضربتهم والخطة نجحت أوي. وسمعت صوتها لأول مرة وهي بتقولي ميرسي.. قلتلها أنتي بتتكلمي؟، اتفاجئت".

وعن سبب فشل تلك العلاقة قال: "تاني يوم صحابي دول واحنا قاعدين مع بعض بعد المدرسة عدوا قدامنا وقالولي أي خدمة يا أوس أوس فضحوني، وهي طلعت مجنونة وقعدت تصرخ في وشي وتقولي كلكم كدابين ومشت وباظ الموضوع، بس فرحت إني اتطورت".

أما الموقف الأخير له مع الحب كان في المرحلة الجامعية، وهو الموقف الذي بعده قرر ألا يخوض تجربة الحب مرة أخرى ويركز في عمله كممثل في المسرح، وهو ما تسبب في نجاحه على حد قوله.

وعن الموقف قال: "في الجامعة كان في واحدة وعزمتها وأنا بتكرم، كان كل اللي في جيبي 20 جنيه جبنا 2 مانجا وقعدت بقى، لقيتها بتقولي أنا عايزة أقولك حاجة فرحت.. لقيتها بتعزمني على خطوبتها، قالتلي قول كنت عايز تقول أيه؟ قلتلها هاتي حساب المانجا لأن مفيش في جيبي غيرهم"

.تابع حديثه قائلًا: "واكتشفت بقى إن الحتة دي مش بتاعتي فركزت في المسرح ونجحت".

أما عن قصة زواجه فكانت الكوميديا جزء منها أيضًا، حيث قال: "مراتي لما حبيتها كانت نائب مدير بنك، فاتعرف عليها إزاي؟ كنت بروح أعمل إيداع في البنك وأطلع برة من المكنة أسحب الفلوس، وأدخل أعمل كشف حساب ملاقيش الفلوس فأدخل البنك اتخانق وهاتولي نائب مدير البنك".

أردف: "واحنا مخطوبين كانت زعلانة مني مرة روحت جبت فرقة مزمار بلدي وجبت طقم من اللي بيتأجروا ميكي ماوس والحاجات دي، لبسته وقلتلها هتطلعي برة تتكلمي معايا ولا أشغل الفرقة؟ مانا لابس البدلة بقى هعمل حركات هبلة ومحدش عارفني".

استرسل: "لما بنتخانق مبتصدقنيش وأنا بتكلم بجد بتقعد تضحك فبتبعتلي اللي مضايقها واتساب أضمن لأنها بتقعد تضحك قدامي مبتعرفش تاخد المشكلة بجد".