الموسيقار عادل حقي: الموسيقى في قمة الهرم الماسوني!
هاجم الموزع والمنتج الموسيقي عادل حقي تهاون نقابة الموسيقيين في ردع ما أسماهم بالظواهر الموسيقية من مطربي المهرجانات مثل شاكوش وحمو بيكا، ومثلهم "توو ليت".
قال "حقي" خلال حلوله ضيفًا على برنامج "القاهرة اليوم" على قناة "ألفا" مع الفنان إدوارد: " الناس بتستهون بالموسيقى وهي في قمة الهرم الماسوني جمب هوليوود وبعد الميديا"، مؤكدًا على أن لذلك دلالة كبيرة جدًا على أهميتها في التأثير على الشعوب.
أوضح: "متخيلين إن عادي يدخل عليها حاجات زي المهرجانات وكده بدون قوانين وردع. لازم النقابة تتحرك ويكون ليها دور"، متابعًا: "الموسيقى ليها دور في تغيير الشعوب والاستخفاف بيها خطر جدًا".
نرشح لك: الجمعة.. القاهرة والناس تذيع فعاليات حفل ختام مهرجان الجونة
وفي نفس السياق، في حديثه عن دور نقابة الموسيقيين، في حماية الذوق العام للشعب وحماية الموسيقيين قال: "في نقابة ملهاش أي دور في حماية حقوق الموسيقيين وماشية بمبدأ "أبجني تجدني"."
أضاف: "كل المطربين اللي النقابة منعاهم من الغنا كان ليهم حفلات في الساحل قريب"، وأردف: "مينفعش أبقى أنا عضو في النقابة بشتغل في الموسيقى بقالي سنين ويبقى زميلي بيكا وشاكوش والناس دي".
تابع: "حمو بيكا كان ممنوع من الغنا وجه في فرح بنت أخويا عادي شوفته مشيت وقولتلهم مينفعش أنا وهو نبقى في مكان واحد".
وتطرق المنتج الموسيقي في حديثه إلى المطرب المُلثم "توو ليت" حيث قال: "توو ليت معملش مزيكا أصلًا. التراك اللي عمله بتاع "تعالى أعدي عليك" موجود على النت خده زي ما هو".
وهاجم الشباب ممن انساقوا وراء ذلك الترند قائلًا: "كفاية هبل.. وكفاية الناس تبقى منساقة ورا واحد عشان لبس حاجة على وشه". وتوقع عدم استمرار نجاحه كثيرًا قائلًا: "هنشوف هيستمر قد أيه؟ الناس دي عمرها قليل جدا، ومشكلتهم الحقيقية إنهم واخدين مكان حد تاني أحق منهم".