درة تتحدث عن تجربتها الإخراجية الأولى للفيلم الفلسطيني "وين صرنا"
تحدثت الفنانة درة عن تجربتها الإخراجية الأولى للفيلم الفلسطيني "وين صرنا" والمقرر عرضه في مهرجان القاهرة السينمائي الدولي بدورته المقبلة.
قالت "درة" في برنامج "xplore" مع الإعلامي هيثم الليث على قناة الفجيرة: "الفنان معندوش قدرة إنه يقدم أكتر من فنه أو صوته، كل واحد باللي بيقدر عليه، أنا بالنسبة لي مكنش كافي أنه مجرد سوشيال ميديا والحاجات دي، الموضوع فرض نفسه عليا، أنا اتعرفت على ناس ظهروا صدفة في حياتي وجالي الإلهام إن أنا أعمل فيلم عنهم، الأول كنت هروح لمنتج، بعدين قررت أن أنا اللي هنتجه من مالي الخاص، هخرجه، وأنا مأخرجتش قبل كده ومدرستش إخراج".
تابعت: "التصوير كان جزء في القاهرة وجزء في غزة، وأنا مكنتش موجودة في الجزء اللي صورته في غزة لأن مكنش ينفع أروح بنفسي، فكنت بتابع مع مصور في غزة وهو كان ممتاز والظروف مش سهلة، مغامرة، أنا حبيت أخد الأحداث زي ما بتحصل.. الشخص اللي بيتكلم عنه الفيلم كان في غزة وهيعبر، المعبر أنا صورت قبل ما يهدوه، دلوقتي مش موجود، صورنا خطواته الحقيقية ولما جه هنا زوجته وعائلته استقبلوه هنا لأنهم جم قبليه".
استكملت: "بالنسبة للقضية الفلسطينية هي قضيتي، بشوف إن جيلنا كله وكمان الجيل الحالي، هما افتكروا الأجيال هتنسى بس الأجيال كل مرة بتفتكر، وهما اللي بيعملوه بيخلينا نفتكر أكتر، أنا بحس جوايا بجانب إن أنا تونسية وعايشة في مصر، عربية بشكل عام، لكن في جوايا واحدة فلسطينية لأن الشعب ده صاحب حق ومظلوم ظلم بين وكبير والعالم كله بيتفرج عليه".
أردفت: "لما قدمته لمهرجان كبير وعريق زي مهرجان القاهرة السينمائي اللي هو يعني يعتبر أعرق مهرجان سينمائي دولي، واخد الصفة الدولية في الوطن العربي، عجبهم ورحبوا بيه وقرروا إن هما يعرضوه في المهرجان فدي حاجة بالنسبة لي أسعدتني جدا لأن ده شرف ليا إن أول تجربة ليا كإخراج يكون مهرجان القاهرة ومتحمسة للعرض وحابة إن الأبطال يكونوا موجودين، أنا بس كنت سبب أن يمكن شيء بيساعدهم يوصلوا صوتهم".