رحاب الجمل تكشف عن أصعب مشهد في "برغم القانون"
حلت الفنانة رحاب الجمل ضيفة على برنامج "لمن يهمه الفنّ" تقديم أميرة نور على نغم إف إم، وتحدثت عن أحدث أعمالها والعديد من الأمور الشخصية.
وفيما يلي أبرز تصريحاتها:
قالت "الجمل": "صحابي بيدلعوني بأسماء كتير، بس أكتر دلع بحبه هو (ريكا) وبعتبره الأقرب لقلبي.. سر النجاح الحقيقي هو تفاعل الجمهور، لما الجمهور بيحب شخصية ويتفاعل مع العمل سواء على مواقع التواصل الاجتماعي أو في الشارع دي بتبقى أكبر جايزة لينا كفنانين".
نرشح لك: كمال أبو رية أحدث المنضمين لمسلسل "كارثة طبيعية"
تابعت: "شخصية "فاتن" في مسلسل "برغم القانون" شخصية مركبة ومليانة انفعالات كتير أرهقتني، وأسعدتني في نفس الوقت، والكاتبة نجلاء الحديني كتبتها بحرفية عالية، أنا زي شخصية "فاتن" في المسلسل في حتة العصبية، ودايما بقحم نفسي في مشاكل مش بتاعتي وأحاول أحلها".
استكملت: "أنا من محافظة دمنهور وبحب أوي اللهجة الصعيدي والفلاحي.. لما بيتعرض عليا دور شبه دور عملته قبل كده بحاول آخده في حتة تانية، لأن كل شخصية بتبقى في بيئة مختلفة".
ذكرت: "ناس كتير ماعندهمش إخوات كتبولي كومنتات إنهم نفسهم في أخت زي "فاتن" تاخد بالها منهم وتاخد حقهم في أي مشكلة، بس بعد كده غيروا رأيهم.. باخد نصايح من ابني، ومرة نصحني نصيحة وقالي "النار ما بتطفيش بنار"، وبحب أتناقش مع الأطفال في عيلتي وأسمع آرائهم".
أشارت: "أصعب مشهد عدى عليا فى مسلسل "برغم القانون" المشهد اللي بيني وبين إيمان العاصى بعد ما سلمت ابنها لأكرم، وإيمان عذبتني عشان تضربني.. ماكانتش عايزة تضرب بجد، بس أنا أقنعتها وفي الآخر عملنا المشهد".
أردفت: "أوجه رسالة لأي واحدة عايشة نفس ظروف "فاتن" مع جوزها في المسلسل، حاولي تغيري منه على قد ما تقدري ولو ماعرفتيش خدي قرار فورا، لكن ماتعالجيش الغلط بغلط.. شخصية "حنان" في مسلسل "صدفة" مابذلتش فيها مجهود لأني جسدت فيها مشاعر حقيقية مع الفنانة ريهام حجاج، وأنا ريهام حجاج صحاب أوي، ولما ببقى في مشكلة بلجأ لها".
قالت: "من الأعمال اللي ماكنتش عايزاها تخلص ولا يتقال فركش من كتر ما الكواليس كانت حلوة فيلم "مستر إكس" وكمان مسلسل "بيت الرفاعى" ومسلسل "صدفة".. حاسة إن فيه جوايا طاقة حلوة ومحظوظة جدا بحُب زمايلي، وإني بشتغل هوايتى اللي بحبها، ما بحبش الظهور كتير إلا لما يكون فيه محتوى يبسط الناس ويبسطني".
أضافت: "بعد مسلسل "لحم غزال" ومسلسل توبة بدأت أقول لازم أعيد ترتيب أوراقي، وأدواري مش بتأثر عليا في البيت خالص، بالعكس بعرف أفصل كويس.. شعاري في الحياة: "قابلوا الرزالة بضحك".