مي عمر تحتفل بانتهاء تصوير مسلسل "إش إش"
احتفلت الفنانة مي عمر بانتهاء تصوير مسلسل "إش إش" المقرر عرضه في رمضان 2025.
نشرت "عمر" عبر حسابها على موقع تبادل الصور والفيديوهات إنستجرام، مقطع فيديو لاحتفال فريق عمل المسلسل بانتهاء التصوير، وكتبت: "الحمد لله رب العالمين فركش مسلسل "إش إش"، حقيقي مش قادرة أوصف إحساسي وأنا بودّع الشخصية اللي عشت معاها رحلة فيها كل حاجة من ضحك وبكاء وقلق وفرح. حبيت كل لحظة قضيتها وأنا بجسدها، وحاسة إن جزء مني هيفضل معاها دايماً، وهيوحشني كل تفصيلة فيها بجد".
تابعت: "شكراً من قلبي لكل حد شاركني الرحلة دي، من الممثلين اللي كانوا أحلى عيلة وأحلى صحاب. بجد، كنا عيلة واحدة، نضحك سوا، نتعب سوا، وندعم بعض طول الوقت. شكرًا لكل واحد فيكم، على كل لحظة ضحكنا فيها، وكل موقف وقفنا فيه جنب بعض. وجودكم خلّى التجربة دي ممتعة، وخلاني أحس إني فعلاً محظوظة بالشغل مع ناس زيكم. مش هنسى الذكريات الحلوة دي أبداً، وهيوحشني كل حد فيكم".
استكملت: "شكرا لكل فرد من فريق العمل اللي اشتغل بإخلاص عشان يطلع العمل ده بأحسن شكل. فريق العمل في إش إش كان سر نجاح كواليس التجربة دي. كل حد في الفريق، من أول التقنيين لحد الإنتاج، كان بيشتغل من قلبه عشان يطلع العمل بأحسن شكل. بجد، ما حسيتش إني لوحدي لحظة، كلنا كنا إيد واحدة ودايمًا بنسند بعض. شكر كبير لكل واحد فيكم، على تعبكم وإخلاصكم وعلى كل لحظة قدمتوا فيها دعمكم وحبكم".
وجهت رسالة شكر لزوجها المخرج محمد سامي: "شكرًا ليك على صبرك وعلى نظرتك اللي كانت دايمًا بتشوف التفاصيل اللي محدش غيرك كان ممكن يلاحظها. شكرا إنك بتعرف ازاي تخرج مننا أفضل ما عندنا وعلى إبداعك وتوجيهك في كل مشهد. شكرًا إنك كنت قائد حقيقي لينا وخلّيت إش إش يبقى تجربة ما تتنسيش".
اختتمت: "مستنية بفارغ الصبر تشوفوا إش إش وأتمنى توصل ليكم مشاعرنا بنفس القوة اللي حسيناها. شكراً لكل واحد كان جزء من الحلم ده! وبوعد الجمهور إن شاء الله هيتفرجوا علي مسلسل متعوب على كل شوط فيه، مسلسل إش إش بإذن الله هيكون مسلسل بيحترم ذوق الجمهور".
مسلسل "إش إش" من تأليف وإخراج محمد سامي، ويشارك في بطولته بجانب مي عمر، كلا من ماجد المصري، هالة صدقي، إدوارد، دينا، شيماء سيف، محمد الشرنوبي، طارق النهري، وانتصار، وأبرز ضيوف الشرف، خالد الصاوي، محمد ممدوح، وكريم فهمي.