شريف نور الدين: محمود حميدة ساهم في تكوين ثقافتي السينمائية أنا وجيلي
أشاد الإعلامي شريف نور الدين، بمواقف الفنان محمود حميدة، الداعمة للسينما دائما، مؤكدا أنه ساهم بشكل رئيسي في تكوين ثقافته السينمائية هو وجيله.
كتب "نور الدين" عبر حسابه على "إنستجرام": "بعيدا عن أن الراجل ده من الممثلين الي حببوني في السينما من كتر ما كان فعلا jeune premier.. واختياراته المهمة والمختلفة وشغله مع أهم مخرجين السينما المصرية أمثال يوسف شاهين، خيري بشارة وأسامة فوزي".
أضاف: "ده غير أنه دعمه واسمه كان سبب رئيسي في خروج فيلم (بحب السيما) للنور، الفيلم اللي بقى عنوان لحياتي وكمان برنامجي الإذاعي (بحب السيما)، بس كمان الراجل ده ساهم بشكل رئيسي في تكوين ثقافتي أنا وجيلي السينمائية من خلال كيان مهم اسمه مجلة (الفن السابع)".
أشار: "كانت موجودة في سنوات مفصلية في تاريخ السينما المصرية، وصرف عليها من جيبه، وحقيقي مكنش مضطر لأنه كان في عز تألقه ونجاحه، لكنه عمل كده عشان هو حقيقي حب المجال ده والفن ده".
أردف: "النهاردة قرر أنه يدعم مشروع أرشيف الفنانين واللي في غاية الأهمية عشان تاريخنا وتاريخ صناع الفن المصري ميروحش بلا رجعه.. اللي مقعدش وسمع من أستاذ حميدة فايتوا كتير أوي".