شقة في الخليفة أو المعز.. حياة يتمناها محمود سعد
كشف الإعلامي محمود سعد عن أمنيته في السكن بمنطقة الخليفة أو المعز لدين الله الفاطمي.
قال "سعد" في مقطع فيديو عبر حسابه الشخصي على موقع تبادل الصور والفيديوهات إنستجرام: "نفسي جدا أخد شقة في الخليفة أو المعز ويبقى فيه دكاكين وانزل الصبح أقول صباح الخير يا حاج محمود ويا عم فلان وحد يقولي تعالى أشرب القهوة ونقعد شوية وبعدين الضهر يأذن ونصلي".
تابع: "متمني اعمل كده بس أعتقد هيقولوا الواد اتجنن، مرة اتجننت قولت لمراتي إيه رأيك نروح نقعد شهر رمضان في فندق كده بيبص على سيدنا الحسين؟ قالتلي بتقول إيه؟ وتجاهلت كل الحكاية.. بحب الحياة دي جدا، الحياة اللي فيها نفس قد مضى والواحد بحاول يستدعيه".
كما كشف عن أكثر شيء يحبه في الحياة، قائلا: "اللحظة اللي ببقى فيها صادق، بتبقى الحياة صادقة معايا وماشية على هوايا، لما بقرأ قرآن بتركيز دي حاجة لا يضاهيها شيء في الدنيا".
اختتم: "لما كنت انزل أصلي الفجر حاضر وأنا نايم كويس وفي السكينة والهدوء ولما اخرج والدنيا بتشقشق، النسمات دي مبنسهاش، ده كان زمان دلوقتي للأسف مبقتش اعمل كده".