بتقوم من النوم برموش!.. عفاف شعيب تنتقد اهتمام الفنانات بالشكل على حساب الدور
انتقدت الفنانة عفاف شعيب المبالغات الكبيرة في الشكل والملابس والديكور في الدراما والسينما على حساب الدور، وكذلك الحوار غير اللائق بالأسرة المصرية، وتقديم المجتمع بأسوء صورة.
قالت "شعيب" خلال حلولها ضيفة على برنامج "قعدة ستات" مع الإعلامية مروة صبري: "كنا بنشتغل زمان بإمكانيات قليلة جدًا بس العمل كان يتغاطى عليها، كان في بساطة، مكنش في العقد والكلاكيع بتاعت دلوقتي".
أضافت: "حاليًا الحوار مش عاجبني، بشوف مسلسل من يومين ففي مشهد واحد كان بيشتم أمه، معقولة! زمان كان في رقابة، آه الدراما بتتاخد من الواقع، بس كنا بنمق الواقع مش بنظهره بالشكل ده".
وعن الإبهار في الدراما على حساب الدور قالت: "بقى كتير جدًا، القصور والبيوت والديكور وكله، حتى اللبس بقى مبالغ فيه على حساب الدراما، ايه البناطيل المقطعة دي؟ مكنش في الكلام ده زمان كنا بنلبس فساتين وحاجات شيك".
أردفت: "المبالغة بقت كتير، مثلًا اللي بتبقى قايمة من النوم برموش ومكياج، أنتي نايمة بالرموش؟".
وأكدت أنها من أجل دور "زينب" الذي قدمته في مسلسل "الشهد والدموع" ذهبت إلى مكتب صرف المعاشات للاحتكاك بسيدات مثل "زينب" لتستنبط منهم تفاصيل الشخصية، مثل طريقة وضع الأموال في منديل، أو تشبيك بدبوس وغيره.