بسبب تشجيع الأهلي.. ميدو يعتذر للجمهور

إسراء إبراهيم

اعتذر أحمد حسام ميدو، لجماهير النادي الأهلي، بسبب تصريحه قبل أيام بالتزامن مع قرعة كأس العالم للأندية، بأنه لن يشجع النادي الأحمر في البطولة.

كتب "ميدو" عبر حسابه على موقع التدوينات القصيرة "إكس": "أنا ابن الزمالك، وأكبر فخر لي في حياتي أني ابن المدرج، ابن الثالثة يمين. بلعب في الزمالك من وأنا عندي ٩ سنين. وأنا طفل صغير كنت بروح بتيشيرت الزمالك في المواصلات علشان الناس كلها تعرف إني ناشئ في الزمالك. بطاقتي وأنا صغير كانت كارنيه اتحاد الكرة اللي مكتوب عليه اسم الزمالك".

تابع: "تتلمذت على أيدي مدربين عظماء علموني الانتماء لفريقي فقط، وأن أشجع الزمالك دون أي فريق آخر في مصر، مهما كان المنافس. وفي نفس الوقت، تربيت على احترام المنافسين، وتهنئتهم إذا فازوا، ومواساتهم بقول "هارد لك" إذا خسروا. هذا هو بالنسبة لي معنى الروح الرياضية!".

أضاف: "لما اتسألت في الاستوديو: "هتشجع الأهلي في كأس العالم للأندية؟"، رديت بطبيعتي، دون نفاق أو كذب، لأن ببساطة ما فيش حاجة في الدنيا تستاهل إنك تكون كذاب ومنافق. أتفق معاكم إن التوقيت ما كانش مناسب، وبعتذر لأي حد زعل من كلامي في حدث مهم يخص النادي الأهلي. وأنا شايف إن الناس اللي زعلت بسبب التوقيت عندهم كل الحق.. لكن، لو اتسألت مليون مرة: "هتشجع أي نادي تاني في مصر غير الزمالك؟"، إجابتي مش هتتغير، وهتفضل زي ما هي لحد ما أموت".

أردف: "أما بالنسبة للهجوم اللي بتعرض له، فأنا عاذر الناس؛ لأنهم ممكن يكونوا اتعودوا على إجابات مختلفة من ناس تصدروا المشهد الإعلامي في السنوات الأخيرة. ناس بتأذي المنافس في الخفاء، وأكتر ناس بتتمنى من قلبها خسارة المنافس".

اختتم: "مش هرد على أي حد هاجمني، لأني ببساطة في مرحلة من حياتي شايف إن مفيش حاجة في الكورة تستاهل الخصومة أو الخناق. بالعكس، الكورة اتعملت علشان نستمتع بيها ونتسلى بيها، ونناكف بعض شوية، لكن مش أكتر من كده! مرة ثانية، بعتذر إذا كنت سببًا في جدال الأيام اللي فاتت، لكن للأسف ده مش ذنبي، إنما بسبب مدمني الترند والدخلاء على كرة القدم، اللي عمرهم ما هيفهموا عقلية مشجع الكورة الحقيقي!".

ميدو يعتذر للجمهور أحمد حسام ميدو النادي الأهلي قرعة كأس العالم للأندية