تفاصيل تعرض إدوارد لوعكة صحية بسبب حقن التخسيس

أعلن الفنان إدوارد تعرضه لوعكة صحية بسبب حقن التخسيس، موضحا أنه عانى من شلل مؤقت في المعدة ولم يتناول الطعام لمدة 4 أيام بسببها.

كتب إدوارد عبى حسابه الرسمي على "فيس بوك": "کلام مهم جدا، أنا كنت باخد حقن التخسيس تحت، إشراف دكتور تغزية ونزلت حوالي 15 كيلو كنت باخد حقن الساكسندة ودي الدكتورة نصحتني بيها بس مشكلتها بتتاخد كل يوم في المعدة بس ميزيتها إننا نقدر نتحكم في الجرعات عشان ما نتعبش ووصلت الوزن اللي أنا عاوزه ودخلنا في مرحلة التثبيت الدكتورة طلبت مني أروح لدكتور جهاز هضمي أعمل تحاليل ونطمن بس أنا طنشت وقولتلها أنا هاخد حقن أسبوعية بدل اليومية عشان تعبت من كل يوم حقنة وفي ناس نصحوني بالتروليستك لأنها أسبوعية وموش قوية زي المنجارو فضلت أخد التروليستك لمده 5 أسابيع كل أسبوع حقنة وكانت تمام معايا وكانت برضو دكتورة التغذية بتسألني على التحاليل كل فترة وكنت بطنش لأني تمام مش حاسس بحاجة وكمان لا كنت بتخن ولا بخس وباكل عادي".

نرشح لك: نقل الفنان حسن عبد الفتاح للمستشفى بعد تعرضه لأزمة صحية

أوضح: "طبعا مواظب على دايت مع الدكتورة والحقن لحد الأسبوع اللي فات فجأة غير جعان خالص وقعدت حوالي 4 أيام ولم أدخل حمام ولا قادر أكل ووجع في معدتي جامد، دكتورة التغذية قالتلي وقف الحقنن وروح لدكتور جهاز هضمي فورًا وعملت كده روحت لدكتور قالي حصلي شلل مؤقت من الحقن في المعدة وكان مفروض تتابع معايا مع دكتورة التغذية قولتله أنا اللي كنت بطنش عشان كنت تمام، قالي الحقن مش وحشة ومفعولها كويس، بس أنا بنصح أقصاها 3 شهور بس تاخدها وتوقف فترة وترجع تاني، بس لازم طبعًا برضو متابعة مع دكتور تغذية".

أشار: "من غير ما طول عليكم أنا بقالي أسبوع بتعالج وعملت كل التحاليل حتى صبغة على الكلى، والحمد الله معنديش غير شوية زيادة في الأملاح زي كل المصريين بطني بتتحسن واحدة واحدة، ولسة المعدة وجعاني، والدكتور قالي من 8 لـ9 أيام ترجع عادي، وإن شاء الله هبقى كويس، أنا حكتلكم تجربتي عشان بقولكوا إن الحقن مش وحشة وجابت نتيجة هايلة معايا بس لازم مع دكتور التغذية دكتور جهاز هضمي وكمان دكتور قلب لو أمكن عشان سرعة ضربات القلب، أتمنى أكون قدمتلكم معلومات كويسة عن تجربتي وربنا يشفي أي حد تعبان وأشوفكم دايما كويسين".