وزير التموين السابق يكشف تفاصيل إصابته بالسرطان
كشف الدكتور علي المصيلحي، وزير التموين السابق، عن تفاصيل إصابته بمرض سرطان الرئة ورحلته مع العلاج، خلال مشاركته في أمسية دينية أقيمت بمركز شباب أبو كبير.
أوضح تفاصيل اكتشافه المرض، قائلاً: "كان عندي صداع في آخر أسبوع من شهر أكتوبر الماضي، وعندما شاهدني"عديلي"، قال لي شكلك مش مظبوط قولتله عندي صداع، قالي أخدت حاجة قولتله أنا عمري ما جالي صداع، قالي خد بنادول".
تابع: "بعد فترة الصداع مازال متواجد فذهبت مع عديلي لصديقه الدكتور أحمد جميل الشرقاوي أستاذ جراحة في القصر العيني، بعدها كلمني وقالي حجزتلك في مستشفى أعصاب بأكتوبر، هنروح نعمل الأشعة على المخ، وقولتله ليه يا دكتور؟.. قالي أنا شاكك يكون عندك جلطة في المخ لأن اتزانك مش مضبوط، وبعد عمل الأشعة رئيس القسم قالي هتستنى معانا شوية علشان محتاجين محاليل لأن الغشاء الذي يغطي خلايا المخ فيها مياه بين الغشاء والجمجمة، وبدأت المياه تضغط على المخ".
أضاف: "الأشعة أوضحت أنه حدث رشح في المخ، وتبين وجود ورم في الفص بالرئة اليمنى، وقالوا لازم تستنى وتاخد محاليل ونشوف دكاترة متخصصين في الأورام.. عملت "مسح ذري" بعد أخذ عينه من الغدد الليمفاوية على المخ علشان يحددوا بالظبط الخلايا، والأشعة خدت حوالي ساعتين".
أردف: "وجدوا في العينة إن طبيعة الكانسر الموجود فيها هو نفسه الموجود في الرئة، والدكتور حسن أستاذ الأورام في جامعة القاهرة، قال نبتدي ببروتوكول العلاج الكيماوي، بـ6 جلسات، والجلسة مدتها 3 أسابيع، وتبدأ في المستشفى، وبعد كدا في البيت".
اختتم: "عيب العلاج الكيماوي إنه بيقرفك، وعن نفسي مبحبش حد يقرفني، إنما يبقى غثيان وإحساس بالقئ، ومفيش أي حاجة ليها طعم، وإحساس وحش جدًا إنك متكونش حاسس بطعم أي حاجة، ومش عايز تأكل ولا تشرب، والموضوع كله بالذات أول 3 أو 4 أيام، لأن بعد الأسبوع الأول يبتدي يبقى معقول، وبعد كدا تبقى أحسن، وآخر 3 أسابيع تبقى عادي، وبتقلل مناعة الجسم.. الدكتور بعدها في الأشعة تفاجأ ولقى النتائج ممتازة، وقال مكنتش متخيل النتائج تكون بهذا الشكل، و"ربنا كريم" الحمد لله".
