عمر طاهر: نجاح "بلبن" فيه نزعة انتقامية
شارك الكاتب عمر طاهر، متابعيه بمنشور كشف من خلاله عن رأيه في شركة "بلبن".
كتب "طاهر" عبر حسابه الشخصي على موقع "فيسبوك": "مشكلتي مع براند بلبن (قال يعني مشاكلي مع كل حاجة تانية في البلد خلصت وده اللي فاضل).. المهم مشكلتي معاه شعوري إنه براند قايم على فكرة وفلسفة واحدة (الشراهة)".
تابع: "شراهة في كل حاجة بيعملها.. شراهة في النجاح والانتشار والفروع في كل حتة وبروزة الزحمة، شراهة في مكونات الأطباق اللي بيعملها طبقات طبقات، شراهة في الإعلان من داخل المطبخ بالحلل الكبيرة والكميات الضخمة، شراهة في المنيو اللي ابتدت برز بلبن وبقت حلويات وعصاير وكحك وشراكة مع محلات هامبورجر، شراهة في أنه يعمل دعاية بكل الإنفلونسرز المتاحين، شراهة في الإعلانات إنه يخاطب كل الفئات وجميع انواع الجماهير بفنانين من شرايح نجومية مختلفة، شراهة في تقديم أنواع جديدة كل يوم مليانة رصة أنواع مختلفة على قد ما تقدر، شراهة في لفت النظر طول الوقت".
أضاف: "البراند مش بيدور على زبون بيستطعم بيدور على حد جعان عايز يلهلط ويهطل ويمشي ريحته سكر خمران في لبن جاموسي.. نجاح تحس إن فيه نزعة انتقامية من حاجة مجهولة، فيه شراهة مطربين المهرجانات بالصيغة اللي لابسينها والعربيات اللي بيستعرضوا بيها والتلقيح والدس والترند، وحس الشراهة اللي بينتشر ده مش بينتج غير إنسان كريه ميملاش عينه غير صوص البستاشيو وهي الحقيقة حاجة لايقة على فترة من تاريخنا المميز فيها الصوت الواحد وشراهته إنه يبلع باقي الأصوات".