طبيب قلب يحذر من منتجات بلبن
حذر الدكتور خالد حامد، طبيب أمراض القلب والقسطرة القلبية، من مخاطر الإسراف في تناول منتجات بلبن.
كتب "حامد" عبر صفحته الرسمية على موقع "فيسبوك": "إعلان بلبن المسئ للعبد ويصور فيه صاحب العبد وكأنه أصيب بأزمة قلبية، وبما إني إستشاري قلب فأحب أفاجئك.. أقسم بالله بلبن منتجاته من أهم أسباب انتشار الأزمات القلبية وجلطات القلب في سن الشباب في مصر".
تابع: "بلبن منتجاته من أهم أسباب انتشار مرض السكري ومضاعفاته الخطيرة في مصر، بلبن منتجاته من أهم أسباب انتشار السمنة المفرطة في مصر، طيب هى تفرق ايه عن العبد يعني؟ أكيد الاتنين واحد وبيستخدموا نفس المكونات الضارة جدا لشرايين الجسم من سكر بالعبيط ودقيق بالهبل وزيوت نباتية رديئة كارثية على القلب والمخ ولكن العبد طول عمره العبد بتاع المناسبات، آيس كريم العيد، كروسان ودانش خروجة وسط البلد، تورته العيلة في عيد ميلاد، حاجة كدة لطيفة صغيرة نتبسط بيها، لحظات سعادة مؤقتة كل فين وفين، أما بلبن حول الأكل الكارثي دة لمخدرات حرفيا".
أضاف: "ايوة زي ما سمعت كدة إدمان بكل ما تحمله الكلمة من معنى، ترند يومي والمفروض إنك تجرب كل يوم حاجة من تشكيلة السموم اللي بيقدمهالك ويجدد فيها ويزن عليك زن وتلاقيها في كل مكان ولازم طبعا أنت كشاب تبحث وراء الترند تجرب كل مرة حاجة قشطوطة غير طزطوزة غير لهاليبو يح يح وهلُم جرّا، وتصبح النتيجة إنك تبقى واقف بكرش مدلدل في طابور طويل بحثا عن مخدر السعادة اليومي ألا وهو السكر، والناس تعدى تتعجب مش معقول كل الزحمة دي علشان طزطوزة بالقشطة".
استطرد: "السكر إدمان حقيقي، يعنى لو كام يوم متواصل أكلت كمية سكر ضخمة، مودك ودماغك مش هتتظبط غير بنفس كمية السكر، ومع الوقت مخك مش هيكتفي بالكمية دي علشان يوصلك لنفس حالة الروقان، فتضطر تزود جرعة السكر اليومي لجرعة أكبر، فتبقى النتيجة طابور طويل وزحمة أنت فاكرها غير مبررة، لكن الحقيقة دول مجموعة من مدمنين السكر وينتهى بهم الأمر بأزمات قلبية ومرض السكري ومضاعفاته الخطيرة وسمنة مفرطة.. خد بالك من أولادك وحافظ عليهم من إدمان السكر، حافظ عليهم من ترندات بلبن".
طبيب قلب يحذر من منتجات بلبن