عمرو محمود ياسين ينتقد إدارة الزمالك: "اللي بيعملوه في الجمهور صعب"
انتقد السيناريست عمرو محمود ياسين، مجلس إدارة نادي الزمالك، مشيرا إلى أن النادي يحتاج إلى إدارة أخرى، مؤكدا أن الإدارة الحالية فشلت في إدارة ملف اللاعب أحمد سيد زيزو بالكامل.
كتب "ياسين"، عبر حسابه الرسمي على "فيس بوك": "يا جماعة صدقوني وبإخلاص شديد بقولها نادي الزمالك محتاج إدارة تانيه خالص اللي بتعمله إدارة النادي في جمهوره صعب جدا ومحدش يقول لي ملكش دعوه وخليك في نفسك لان انا بعتبر نادي الزمالك جزء من تكويني كمواطن مصري".
تابع: "وصدقوني أنا دايما بيهمني إني أشوف نادي الزمالك قوي أنا مش من الجمهور اللي بيعتبر أن فشل الزمالك وانحداره في المستوى شيء إيجابي أو يسعدني بالعكس هو أصلا كلما ارتفع مستوى نادي الزمالك ارتفع مستوى النادي الأهلي وارتفع مستوى كره القدم في مصر".
أشار: "وما تقوليش روح قول للخطيب ولا روح قول للنادي الأهلي هو اللي بيوقعنا لأن باختصار طب وحضرتك فين لو اللي بتقوله ده صحيح أنت كنادي وكمجلس إدارة وكرجال نادي الزمالك أنتم فين من ده؟".
أضاف: "كل اللي حصل مع ملف أحمد زيزو غلط في غلط من أول لما فشلوا في بيعه لما جات لهم العروض طمعا في التجديد له.. مرورا بعدم التجديد له وفشلهم في ده.. انتهاء باستبعاده من خططهم فيما تبقى له من مدة في العقد".
أردف: "طبعا مش هننسى المنظر الساذج العبيط واللقطة العبثية مع صورة زيزو وهي بتسقط على الأرض وناس غريبه كده فاكرينها صورة طاغية من طواغيت حكم ديكتاتوري مثلا وبيدوسوا عليه كأنهم اسقطوا شاوشسكو بجد يا جماعة حرام اللي بيحصل في نادي عظيم وعريق زي ده".