بعد تعاونهما في "موضوع عائلي 3".. نصيحة ماجد الكدواني لـ ياسمينا العبد

تحدثت الفنانة الشابة ياسمينا العبد عن الشخصيات التي قدمتها مؤخرا، منها شخصية "زينة" في مسلسل "لام شمسية"، وشخصية "شيماء في الجزء الثالث من مسلسل"موضوع عائلي".

قالت"العبد" خلال لقائها مع "رؤيا مصر": "وأنا بحضر لشخصية زينة حسيت أن الموضوع قريب جدا ويخض، فكرة أن الحاجات دي مبتحصلش غير من الناس القريبة حاجة تخض وتخوف أن معظم الأوقات الحاجات دي مبتحصلش إلا من الدايرة القريبة من الطفل، والمسلسل خلى يكون فيه كلام بيحصل بين الأطفال وأهاليهم".

أضافت: "إحنا فوجئنا بأن فيه ناس طلعوا اتكلموا وقالوا إنهم تعرضوا للتحرش من أول الحلقة التانية أو التالتة فكان لينا تأثير إيجابي".

تابعت: "الشخصية كانت محتاجة بحث كتير أوي وفكرة أن البنت بتتعامل مع اكتئاب مامتها أو أي فرد من العيلة كان محتاج تحضير نفسي وجسدي دور معقد ومركب وله تفاصيل كتير جدا".

أما عن مشاركتها في الجزء الثالث من مسلسل"موضوع عائلي"، قالت: "شخصية شيماء في موضوع عائلي دور شعبي وأظن الناس فوجئت شوية والحمد لله ردود الأفعال كانت غير اللي أنا متوقعاها كنت متوترة وخايفة جدا، وكنت بقول أنا سبب فشل الموسم".

كما كشفت عن نصيحة الفنان ماجد الكدواني لها قائلة: "أستاذ ماجد كان دايما بيقول لي خليكي واثقة من نفسك، أنتي عارفة انتي بتعملي إيه، وفكرة أنه يقولي حاجة زي كده كانت مستحيلة بالنسبة لي، دي تاني مرة أشتغل معاه ومش مصدقة.. وهو كان واثق فيا".