بعد انتشار أنباء خطبته.. حسام حبيب يهدد باللجوء للقضاء

علق الفنان حسام حبيب على الأنباء التي ترددت مؤخرًا بشأن خطبته من عارضة أزياء أردنية، خاصة مع انتشار صورة تجمعهما، مؤكدًا أنه سيلجأ للقضاء ضد مروجي هذه الشائعات.

قال "حبيب" في تصريحات لـ "ET بالعربي"، إن الأمر لم يصل بينهما لخطوبة بعد، موضحًا: "الموضوع موصلش للخطوبة نهائي، هما سبقوا الأحداث وخلّوا الموضوع يتعقّد بدل ما يحصل فيه خير.. ومش عارف الناس عايزين إيه مني بجد، على طول الناس بتخربلي حياتي".

نرشح لك: سعد الصغير يعلن عن مبادرة لمساعدة النساء الأرامل والأيتام

أوضح: "إن كان في حاجة، هما كده بوّظوها، لأن أهل البنت ليهم عاداتهم وتقاليدهم، وناس محترمين جدًا جدًا. زيّ ما إحنا زمان كان لينا عاداتنا وتقاليدنا، وكنا بنتحرم يعني إيه بنت، مش عارف إيه اللي حصل للمصريين؟ النخوة اللي كانت عندنا راحت فين؟".

أشار أن البعض أصبح غرضهم تحقيقي مشاهدات عالية وتصدر الترند دون أي شيء آخر، مضيفا: "الناس بقت بتتكلم في أي حاجة لمجرد التريند وتحقيق المشاهدات بس! وييجوا يقولوا: حسام هو اللي بيدوّر على اللقطة! فين اللقطة أنتم اللي بتدوروا ورايا أهو!".

أكد أن البعض أشار إلى أنه علا علاقة بهذه البنت منذ سنوات، وهو أمر عارٍ من الصحة، موضحا:"هي أصلاً البنت عندها كام سنة عشان يتقال كده؟ ابعدوا عن حياتي بقى، إمتى هتسيبوا الناس في حالها؟ عمرنا ما اتكلمنا عن مين خَطَب ومين اتجوز، ولو حصل، بيتكلموا بعد الأحداث. دلوقتي بيتكلموا عن بنت وليها عائلة كبيرة، وبقى كل همنا التريند والفيديو ده يجيب كام؟".

اختتم أنه سيلجأ للقضاء بسبب انتشار هذه الشائعات، موضحا: "اللي جاي بقى هيبقى وحش، وهيبقى في قضايا، ولازم كل حاجة يكون ليها حدود، ومش المفروض نتكلم عن أعراض الناس.. هشوف مين اللي كتب الكلام ده على لساني وهحبسه، لأني ما قلتش لأي حد، وأنا هكبر المشكلة، لأن البنت دي بنت ناس كبيرة أوي في الأردن، فهندخل القضايا ونشوف بقى!".