مستعينة بصور النجوم.. أسماء جلال تقدم نصائح للتعامل مع الحيوانات
اسراء إبراهيم
شاركت الفنانة أسماء جلال مجموعة من النصائح، للتعامل مع مع الحيوانات، بعد تداول واقعة قتل كلب منذ أيام، انتقدها بشدة جمهور مواقع التواصل الاجتماعي.
استعانت "جلال" خلال كتابتها النصائح، بصور للنجوم مع الحيوانات، منهم: صبا مبارك، أمينة خليل، سارة عبد الرحمن، مريم الخشت، ريهام عبد الغفور، إياد نصار، ومحمد شاهين، وآخرين.
نرشح لك: رانيا فريد شوقي: ربنا يبتلي اللي يقتل حيوان
وفيما يلي مجموعة النصائح التي شاركتها أسماء عبر خاصية القصص المصورة على حسابها بموقع التواصل الاجتماعي "إنستجرام":
- الرأفة بالحيوان مش مجرد واجب ديني، ده إنسانيتنا.. تخيل تعاملك مع الحيوان هو اللي بيحدد أنت قد إيه إنسان
- الرحمة والرأفة مبتتجزأش، اللي بيهون عليه حيوان (روح بريئة) ربنا خالقها زيها زيك في الأرض، يهون عليه أي كائن حي
- ماينفعش نأذي حيوان لمجرد إنه مش قادر يدافع عن نفسه، لو ماقدرتش تساعد، على الأقل ما تأذيش، الرحمة بالحيوانات بتعلمنا نكون أحن على بعض كبني آدمين، فخلي قلبك دايما فيه رحمة، واعرف إن كل كائن حي له حق يعيش بأمان
- الرحمة مش ضعف، دي قوة، وبتقول عنك كتير من غير ما تتكلم. واللي يرحم مخلوقات ربنا، ربنا بيرحمه في كل خطوة.
- وصدقني الحيوان اللي تساعده عمره ما هينسى. يمكن مايعرفش يقول "شكرا"، بس دعوة في السما تطلع بسببك، ورحمة تنزل عليك من غير ما تحس
- اللي بيحب الحيوانات، مستحيل يكون قلبه قاسي، دي كائنات ربنا خلقها عشان تعلمنا معنى الإنسانية
- لو واحد فينا عامل الحيوان برحمة، الشوارع هتبقى أهدى، والقلوب أنضف. مين قال إن الرحمة بس للبني آدمين؟
- ربنا إدانا عقل عشان نفهم، وقلب عشان نرحم. وكل مرة بنختار فيها نساعد، بنثبت إننا لسه بشر بجد
- ابدأ بحاجة بسيطة. طبق مية، لقمة حلوة، حضن دافي. والأهم، علم ولادك إن الرحمة بالحيوان مش اختيار. دي جزء من تربيتهم
نرشح لك: فيدرا لقاتلي الحيوانات: سيبوهم يعيشوا يمكن يبقوا باب بركة
- الرحمة مش بتتقاس بكلام، بتتقاس بتصرف بسيط، بحنية في المعاملة، وبخوف على كائن مش قادر يدافع عن نفسه. وكل مرة بتختار تكون أحن، صدقني أنت بتكبر في نظر ربنا. وفي نظر نفسك.
- الرحمة هي الشيء الأساسي اللي ممكن يحسسنا بأمان تجاه الإنسان، متستكترش الرحمة على أضعف المخلوقات
- الرحمة أحلى صفة ممكن تكون موجودة في قلب الإنسان
