برسالة مؤثرة.. ملك أحمد زاهر تهنئ شقيقتها ليلى بحفل زفافها
هنأت الفنانة ملك أحمد زاهر شقيقتها ليلى بحفل زفافها على الفنان هشام جمال، معبرة عن حبها الشديد لها وسعادتها بها، مؤكدة أنها تشعر وكأنها ابنتها وليست شقيقتها، رغم فارق السن الصغير بينهما.
نشرت "زاهر" فيديو يحتوي على صورة تجمعهما منذ طفولتهما وحتى حفل الزفاف، عبر حسابها الرسمي على موقع تبادل الصور والفيديوهات "إنستجرام"، موضحة: "من أول ضحكة وإحنا اطفال لحد لحظة كتب كتابك.. كل لحظة في الفيديو ده هو عمر كامل بينا، هو حب وأمان وضحك ومشاركة.. علاقتي أنا وأنتِ مش شبه أي حد".
أضافت: "مش مصدقة إن الوقت جري كده، كنا لسه صغيرين، وبنتخانق على اللبس، وبنستخبى من ماما.. وفجأة لقيتك لابسة فستانك الأبيض، أحلى عروسة شافتها عيني، أنا بحبك أوي، حب مفيهوش شروط ولا حسابات".
تابعت: "مع إن الفرق بينا مش كبير أقل من سنة، بس طول عمري حاسة إنك بنتي مش أختي.. وإمبارح بنتي اللي كانت بتتجوز مش أختي، وأنا الفرحة مش سيعاني، بس في نفس الوقت، وحشتيني قوي من دلوقتي".
استكملت: "أنتِ مش بس أختي حبيبتي، أنتِ أحلى حاجة حصلتلي في حياتي، وهفضل دايمًا أقرب واحدة ليكي، أحنّ حضن، وسند من غير كلام.. ربنا يسعدك يا روحي ويخليكي دايمًا قلبك مرتاح مع عريسك اللي ربنا يحفظهولك ويفضل يسعدك العمر كله، وأنا دايمًا جنبك في كل خطوة.. بحبك يا عروستي الحلوة ".
اختتمت: "اللهم احفظ أختي وزوجها من كل سوء، وبارك لهما في حياتهما، واصرف عنهما الحسد والشر، وأدم عليهما السكينة والمودة".