مؤمن المحمدي يكتب: بالمناسبة (1) الأهلي والجيش وطلايعه
مع كل ماتش لـ الأهلي في الدوري، في أفريقيا، في أي حتة، هـ نحكي شوية بـ مناسبة الماتش ده، عن الفريق اللي الأهلي بـ يلاعبه، وشوية قصص وإحصائيات، وأشياء من هذا القبيل.
والأهلي النهارده بـ يلاعب طلائع الجيش، ده ما كانش اسم النادي لما اتأسس سنة 1995، كان اسمه نادي “الجيش المصري”، زي الجيش الملكي المغربي. وما كانش أول نادي تابع لـ القوات المسلحة، كان قبله مثلا نادي “السواحل”، اللي بقى بعد كده “حرس الحدود”.
لما كان نادي “الجيش” بـ يلعب في دوري المظاليم، أوائل الألفية، كان جرنان “الفرسان” ورئيس تحريره أسامة خليل بـ يغطوا مباريات الدرجة التانية والتالتة، فـ حصل إن نادي “مزارع دينا” كسب “الجيش” خمسة/ صفر، فـ المحرر كتب الخبر عادي: “دينا تسحق الجيش بـخماسية”.
أسامة خليل قال: “يا نهار إسود، مفيش حاجة اسمها دينا تسحق الجيش، هـ تودونا فـ داهية”، ولـ إنه مكنش فيه وقت كبير لـ التفكير، خلوا الخبر: “دينا تفوز بالخمسة”، على مين بقى؟ مش مهم.
الحكاية دي نبهت الصحفيين إن النادي ده خطر، وإنت عارف عناوين الجمهورية والمساء، ولما يصعد الدوري الممتاز بقى (وهو أكيد هـ يصعد، هو معمول علشان يصعد) لما يصعد الممتاز بقى، ممكن تلاقي عنوان: “الأهلي يحتل الجيش” أو “نكسة الجيش أمام الترسانة”، علشان كده لما النادي صعد فعلا موسم 2004/ 2005 غيروا اسمه لـ “طلائع الجيش”.
وعلى فكرة، نادي “دينا” كمان اسمه له حكاية شبيهة. النادي كان اسمه “اتحاد عثمان” لما صعد لـ الممتاز 1996/1997، وعثمان ده طبعا هو عثمان أحمد عثمان، ودينا واحدة من الأسرة، غيرت بعدها اسم النادي لـ اسمها فترة، فـ حسن المستكاوي كتب، إنه يا جماعة ما يصحش نكتب: ضهر دينا ووسط دينا وبـ يلعب في دينا، وكده يعني، فـ غيروه لـ “مزارع دينا”
المهم، أول ماتش لعبه الأهلي قدام طلائع الجيش موسم 2004/ 2005، اللي كان موسم إعجازي، كان في الأسبوع العاشر. الأهلي كان ماشي كويس، وكسبنا كل التسع ماتشات الأولانيين، والفرق بيننا وبين الزمالك بقى عشرة بونط.
الزمالك مشى وقتها دراجوسلاف مديره الفني اليوغسلافي، بعد ما اتغلب من أسمنت السويس 2/1، وجابوا أحمد رمزي، وبدؤوا التفاوض مع كابرال علشان يرجع، فـ أول تصريح لـ رمزي كان إن “الدوري لسه في الملعب”، والجملة دي شبعت تريقة وقتها، وكان محور الهتافات في المدرجات.
المهم إن الزمالك بـ القيادة الجديدة غلبت الترسانة 3/ صفر، والمنصورة في المنصورة 1/ صفر، فـ ده شوية خلى الأمر يبدو وكـ إن كلام رمزي حقيقي، فـ كان ضروري الأهلي يكسب ماتش الجيش، يوووه طلائع الجيش، علشان يقفل العلامة الكاملة، ويحافظ على الفرق، خصوصا إن الدوري كان هـ ياخد راحة شوية بعدها، وهـ نلعب دور الـ 32 في الكاس.
فضل الجيش محجر، لـ حد الدقيقة 83، لما جه خالد بيبو خد كورة عنترية كده من ناحية الشمال، ولعبها عرضية، خدها بركات ضحك ع المدافع، وشمعها في الزاوية البعيدة، وده كان أول هدف على الإطلاق لـ بركات بـ فانلتنا، بعد ما كانت إجوانه بـ ترف في شبكتنا.
ساعتها، بركات قلع الفانلة، علشان ياخد إنذار، ويخلص إنذاراته، ويتوقف ماتش الكاس، اللي كده كده مكنش هـ يلعبه، كنا هـ نلاعب الطيران ومش مستاهلة.
وبعد 25 يناير، الدوري وقف شوية، ولما استأنفوه، أول ماتش لـ الأهلي، كان قصاد الشرطة، وكسبناه 2/1، واللي بعده كان الجيش وكسبناه 1/صفر، فـ واحد صاحبنا قال إيه: الأهلي كده كسب الجيش والشرطة، وفاضل له الشعب.
إنما أشهر ماتش لـ الأهلي مع طلائع الجيش، ماتش ريشة، وده عايز كلام كتير ومنفصل، فـ خليه لما نلاعبهم تاني.
إحصائياتك بقى:
في الدوري لعبنا 16 ماتش (الموسم اللي ما كملش مش محسوب) كسبنا 13 ماتش، واتعادلنا تلاتة، وما خسرناش من الجيش أو طلائعه أبدا.
سجلنا 36 هدف، واستقبلنا 9، الغريب إن أول 8 ماتشات استقبلنا هدف واحد، وآخر 8 ماتشات استقبلنا 8 (يعني بـ معدل هدف في كل مباراة)
عماد متعب أكتر واحد سجل، 7 أهداف.
واتقابلنا في الكاس مرة واحدة موسم 2006/ 2007 وكسبنا 3/1
يعني النتيجة النهائية 39/10
وإن شاء الله هـ نكسب