مؤمن المحمدي يكتب: بالمناسبة (2) محلة .. محلة

من ساعة ما صعدت غزل المحلة لـ الدوري الممتاز موسم 1956/ 1957، وله مع الأهلي قصص وحكايات روايات في الدوري والكاس. بس اللي حصل موسم 1977/ 1978، مالوش زي، ولا يتحكي ولا يتقال.

بص يا سيدي:

في 31 مارس 1978، كان الأسبوع الأخير لـ الدوري الممتاز، وعلشان تبقى في الصورة، المنافسة كانت بين الأهلي والزمالك بس، مع إنه في السنين دي كان عادي إن المحلة يدخل في المنافسة، بل وياخد الدوري كمان. يعني مثلا المحلة كسبت الدوري موسم 72/ 73، ودخلت ماتش فاصل مع الأهلي على الدوري موسم 75/76، يعني هم تاني الدوري.

في الموسم اللي بـ نحكي عنه (77/78) دخلنا الأسبوع الأخير، الأهلي والزمالك متساويين في النقط، كل نادي عنده 39 بونط، وكان الفوز بـ اتنين بونط بس، فـ ده رقم مش قليل. الزمالك هـ يلاعب مين؟ الإسماعيلية في الإسماعيلية. والأهلي هـ يلاعب مين؟ غزل المحلة في القاهرة.

طيب، لو الأهلي كسب والزمالك كسب، يبقى كل نادي عنده 41 نقطة، نعمل إيه؟ كانت اللايحة وقتها الاحتكام لـ فارق الأهداف، وفارق الأهداف كان لـ صالح الزمالك، بس مش فارق كبير، كان الزمالك له (+32، سجل 49 واستقبل 17)، والأهلي (+29، سجل 37 واستقبل 8)، يعني إيه؟

لو الزمالك كسب الإسماعيلي 1/ صفر، يبقى لازم الأهلي يكسب المحلة 4/ صفر علشان ياخد الدوري، لو كسبنا 3/ صفر بس يبقى الدوري في ميت عقبة، أو لو كسبنا أربعة والزمالك كسب اتنين.

الحاجات كانت مكهربة، فـ اتحاد الكورة قرر يلعب الماتشين في وقت واحد، لـ أول مرة في التاريخ، ومكنش لسه الفيفا عمل النظام ده، الفيفا عمل كده بعد مونديال 1982، بـ سبب التواطؤ بين ألمانيا والنمسا ضد الجزاير.

قبل ماتشين الأسبوع الأخير في الدوري، بدأ الكلام عن تواطؤ هـ يحصل، الإسماعيلي هـ يفوت لـ الزمالك، لأ، المحلة هو اللي هـ يفوت لـ الأهلي، يا عم مش معقول، يعني هو الإسماعيلي هـ يقبل يتغلب في الإسماعيلية علشان خاطر عيون الزمالك، يعني هو المحلة اللي هـ يرضى يدخل فيه أربع إجوان، وإيه؟ لا الخطيب ولا طاهر الشيخ ولا عامر هـ يلعبوا (يعني الأهلي من غير خط هجوم)؟

المهم، بدأ الماتشين، والزمالك جاب الجون الأول، فـ بقى لازم الأهلي يجيب أربعة، فـ جبنا جون، اتنين، التالت لغاه الحكم (كان اسمه حسين فهمي) ثم جه التالت شرعي، ثم الرابع، والنتيجة بقت أربعة صفر فعلا، ومحدش مصدق.

فاضل أد إيه؟

ربع ساعة. كده الدوري في الجزيرة.

طبعا يدوب تلات دقايق، والزمالك جاب التاني، سجله عبد الرحيم محمد، فـ بقى الدوري في ميت عقبة، كده الأهلي لازم يسجل الخامس. وفاضل 12 دقيقة، بس الأهلي ما سجلوش.

يقول العالمون بـ بواطن الأمور، والله أعلى وأعلم، إن المحلة رفضت تستقبل الخامس، وقالوا أصلا أربعة كتير، والجماهير هـ تقطعنا لما نروح، والبلعوطي (حارس المحلة) هدد بـ فضح كل حاجة لو الخامس جه.

أنا ما أعرفش مدى صحة الكلام ده، بس اللي أعرفه إن جماهير المحلة فعلا خرجت تستنى أتوبيس الفريق على أول البلد، علشان تعاقبهم ازاي تتغلبوا أربعة، وده تواطؤ، والكلام ده نشرته الجرايد (قريته في الجمهورية كتبه ناصف سليم) والفريق روح بـ صعوبة.

وهكذا، خسرنا الدوري بـ فارق هدف، وآه صحيح، نسيت أقول لك إن الهدف ده كان اعتباري، يعني الزمالك كمان ما سجلوش، قول لي ازاي؟

في ماتش الزمالك وغزل المحلة، اللي كان في غزل المحلة، الزمالك كان كسبان واحد/ صفر، فـ حد من جماهير المحلة حدف طوبة جت في حامل الراية رفاعي سرور. حكم الماتش صفر نهاية المباراة، فـ اتحاد الكورة قرر “اعتبار” النتيجة فوز الزمالك 2/ صفر، وبـ الهدف ده كسب الزمالك دوري من الـ 12 دوري اللي كسبهم.

إييييه دونيا

إحصائياتك بقى:

لاعبنا المحلة 84 ماتش في الدوري، على 42 موسم، كسبنا نصهم بـ الظبط 42 ماتش، واتعادلنا 29، وخسرنا 13 ماتش، في تمان مواسم كسبناهم رايح جي، وهم عملوها مرتين.

سجلنا 100 جون بـ الظبط، الهدف الـ مية جابه تريزيجيه في آخر ماتش موسم 2013/2014 قبل ما يهبطوا، واستقبلنا 55 جون آخرهم سجله حسام عرفات في نفس ماتش تريزيجيه.

سنة 98 لعبنا أربع مباريات، المرتين بتوع موسم 97/98، والمرتين بتوع موسم 98/99، ودي حاجة مش ممكن تحصل غير في مصر.

في الكاس، لعبنا 12 ماتش، منهم ماتشات في مجموعات، وماتشات رايح جي، علشان كده مش كل ماتش فريق بـ يتأهل على حساب فريق.

كسبناهم سبع ماتشات، وتلاتة تعادل (بـ ما في ذلك اللي اتحسمت بـ ضربات جزاء) وخسرنا ماتشين، اتأهلنا على حسابهم أربع مرات، وهم اتأهلوا تلاتة، واتقابلنا مرتين في الفاينال، المرتين كسبناهم (المحلة لعبت نهائي الكاس 6 مرات، ما كسبتوش ولا ماتش).

وإن شاء الله هـ نكسب

الصفحة الرسمية للكاتب مؤمن المحمدي

اقـرأ أيضـاً:

مؤمن المحمدي يكتب : ألف مشهد ومشهد (63) المُر .. “سك”

مؤمن المحمدي يكتب: بالمناسبة (1) الأهلي والجيش وطلايعه

مؤمن المحمدي يكتب: عزيزي الزملكاوي.. أقول لك ولا تزعلش؟

مؤمن المحمدي يكتب: ألف مشهد ومشهد (62).. العشاء الأخير لإبراهيم أفندي

مؤمن المحمدي يكتب: ألف مشهد ومشهد (61) الريحاني كوميرشال

مؤمن المحمدي يكتب: ألف مشهد ومشهد (60) البطل المصري

مؤمن المحمدي يكتب : ألف مشهد ومشهد (59) سامية أخر جمال

مؤمن المحمدي يكتب: ألف مشهد ومشهد (58) ..وين الرقاصة؟

.