مؤمن المحمدي يكتب: بالمناسبة (4) المقاصة التاريخية
يا أخي سبحان الله، صعب الواحد يتكلم عن حاجة “تاريخية”، وهو بـ يتكلم عن نادي أول مرة نشوفه فيها كان موسم 2010/2011، ومع ذلك، معظم لقاءات الأهلي والماصة فيها حاجات ينفع نقول عليها تاريخية.
نادي “مصر المقاصة” بقى اسمه كده بعد ما خد رعاية مالية من شركة “مصر للمقاصة”، بعد تغيير الاسم كذا مرة، وأول اسم ليه كان نادي “هويدي”.
صعد لـ الممتاز في الموسم اللي قلنا عليه، وأول لقاء بينه وبين الأهلي كان يوم 22 يناير 2011، يعني كان فاضل تلات أيام، الماتش ده انتهى تعادل 1/1، واللي جاب جون الأهلي أبو تريكة، وكان الهدف رقم 100 في الدوري لـ تريكة، وطبعا كنت مستنيه جدا، بس لما اتسجل جالي إحباط، لأ، إحباطين.
الإحباط الأول إنه جه من ضربة جزاء، ودي بـ النسبة لي أسخف طريقة لـ تسجيل الأهداف، ونفسي لما نحسب الهدافين ما نعملش حساب ضربات الجزاء، وعلى فكرة زمان كان فيه حاجة شبه كده، بـ معنى لما كان اتنين لاعبين يتشاركوا في لقب هداف أي بطولة، كان لقب الهداف يروح لـ الأقل في التسجيل من ضربات الجزاء.
المهم، الإحباط التاني كان من المعلق أيمن الكاشف، يعني الدنيا كلها مستنية تريكة يسجل الهدف الـ 100 إلا هو مكنش عارف، والله يرحم محمد نصر لما حسام حسن جاب الهدف الـ 100، وكان في المقاولين موسم 98/99، كان مخرج اللقاء في التلفزيون المصري، وكان مستعد، أول ما جه الجون، قطع وجاب أول جون لـ حسام في الدوري (كان في المصري) وساعتها حولوه لـ التحقيق في ماسبيرو.
أول ماتش لـ الأهلي والمقاصة ده كان أول ماتش لـ جوزيه في ولايته التالتة، وأول ماتش يلعبه أيمن حفني ضد الأهلي، وحتى سامح العيدروسي اللي جاب جون المقاصة، كانوا لسه شاريينه من المصري في انتقالات يناير.
ما ننساش برضه إن سنتها الزمالك كان متقدم على الأهلي بـ 6 بونط، واللي بدأ نزيف النقاط كانت هزيمة الزمالك من المقاصة.
أما اللقاء التاني لـ الأهلي قصاد المقاصة، مع إنه كان تحصيل حاصل، بس برضه نقدر نسجل إن فيه لعب أحمد حسن آخر ماتش ليه مع الأهلي، وسجل آخر جون بـ فانلة الأهلي.
حكاية أحمد حسن دي مش قادر أفهمها، الراجل عقده خلص، وطلع في كل التلفزيونات يقول إنه عايز يجدد لـ الأهلي، ومش هـ يمضي لـ أي نادي غير لما الأهلي يحسم موقفه منه، ومستعد يجدد على بياض، وكل الكلام اللي إنت عارفه، بس جوزيه كان مصمم إنه يمشي.
اللي عرفته إن السبب كان دخول أحمد حسن في مفاوضات مع الزمالك أثناء الموسم، على سبيل الاحتياط، بـ حيث لو الأهلي ما جددلوش ينط هناك على طول، ودي حاجة بـ تغيظ الأهلي دايما.
مفيش حاجة اسمها تتفاوض مع نادي تاني، خصوصا الزمالك، ده معناه إنك مش حاسب نفسك ضمن منظومة الأهلي، فـ يبقى إنت مش ضمنها، خصوصا إنه لما بدأ التفاوض مع الزمالك مكنش الدوري لسه اتحسم، فـ أول ما اتشم الخبر قرروا يبيعوه في نهاية الموسم، اللي مش فاهمه إنه حتى لما اعتذر وتاب وأناب برضه محدش رضي ياخد بـ اعتذاره.
عموما، واضح إن أي واحد ياخد لقب عميد لاعبي العالم لازم يبقى اسمه حسن، ويبقى بـ يلعب في الأهلي، ويسجل فـ الزمالك، وبعدين يلعب لـ الزمالك ويسجل لـ الأهلي.
اللطيف، إن مصر المقاصة اللي ما اتغلبش من الأهلي في أول موسم ليه، واتعادل رايح جي، ما عرفش بعدها حتى يتعادل تاني، واتغلب في الموسمين اللي بعد كده.
حكايات بقية مباريات المقاصة، خليها لما نلاعبهم تاني
إحصائياتك بقى:
لعبنا مع المقاصة 6 مباريات، اتعادلنا 2 وكسبنا أربعة، وكلهم في الدوري.
سجلنا 13 هدف، منهم 4 ضربات جزاء، واستقبلنا 4 أهداف
المقاصة سجلت الأهداف الأربعة في أول تلات لقاءات، وآخر تلات لقاءات ما سجلتش حاجة.
وإن شاء الله النهارده ما تسجلش
وإن شاء الله هـ نكسب