وانا بتصفح اﻻخبار شدتني أجور مذيعي التوك شو اللهم صلي علي النبي، أعلاهم حوالي 11 مليون سنويا وأدناهم مليون و 200 الف جنيه، الإبراشي اللي مش عاجبك مقدم برنامج الحريقة بياخد كام في السنه؟ 4مليون و 200 الف، احسب انت في اليوم الواحد في 4 ساعات في موضوع واحد يقرفنا بيه ويولعها زي ما بنقول يقف الموضوع بكام ؟
نفسي أسال سؤال واحد بس لأصحاب هذه القنوات بتدفع هذه المرتبات منين؟ أقولك أنا من دمي ودمك ودم أطفالنا وصحتنا وصحتهم ، من اعلانات المأكولات والمشروبات المنتهية الصلاحية ، إعلانات هابطة ومقززه ، تافهة مثيره للاشمئزاز والتخلف ، تزيد من تخلف أطفالنا ، وللأسف الشركات تدفع الملايين لترويج منتجاتها ، وتذيد من أرباحها ، ويتحمل هذه الزيادات هو الشعب الغلبان.
كانت فريده الشوباشي مع عزه مصطفي بتتكلم عن العدالة الاجتماعية والحد الأدني للاجور ، طبعا عندها حق 1200 جنيه لا يكفوا فرد واحد في الشهر ، فما بالك لو كان فيه طفل كمان مش اكتر! شوف يصرف كام الطفل يوميا؟ أقل مافيها وهو رايح المدرسه يشتري له باكو بسكوت أو علبه عصير وإلا تسيبه يشحت من زميله ولا يسرق من شنطته؟
ولسه كمان الدرس الخصوصي احسب ؟ ولسه العلاج وهلم جري ، عمرك ماهاتحقق العدالة بدون ما تضبط قنواتك أولا ، إمنع إعلانات الأكل والشرب التافهه ، المنتج موجود علي أرصفه الشوارع ، أنا بأشتري اللي جربته وعجبني ، وباقول لأصحاب القنوات والمذيعين في التليفزيون إتقوا الله في شعب مصر ، الملايين الي بتاخدوها من شويه الهمبكه والزعيق الي بتعملوه ، بأأكد لكم إن الناس ماعادتش مستحملاكم ، إمنعوا إعلانات الأفلام والمسلسلات الهابطه والمتخلفة ، اللي تسببت في زيادة الإجرام والإنحلال في البلد ، وساعتها بس كل الفلوس اللي داخله في جيوب طبقه معينه ممكن ترجع للشعب وقتها.
