مؤمن المحمدي يكتب: بالمناسبة (6) حرس الحدود يا أهل الله
من المعلوم بـ الضرورة إن حرس الحدود هو نفسه نادي “السواحل”، اللي صعد الدوري الممتاز في الستينات، ولعب موسمين، وهبط، علشان يصعد تاني بعد أربعين سنة، في موسم 2002/2003 بـ اسم “حرس الحدود”.
طيب، الحكاية دي مش معلومة بـ الضرورة ولا حاجة، وفيها غموض شويتين، قول لي ليه؟
أقول لك: ليه؟
علشان المتصور إنه نادي السواحل لما هبط، لعب في دوري المظاليم لـ حد ما رجع تاني، لكن لما تيجي تتبع نتايجه تحت، هـ تلاقي الحكاية مش كده، وإن النادي اتلغى واختفى من الوجود تماما، وإن حرس الحدود تم إنشاؤه سنة 1995، فـ بالتالي ده حاجة، ودوكهه حاجة تاني خالص.
وهي تفرق؟
شوية تفرق، علشان حضرتك عارف إن الدوري المصري بـ يواجه مشكلة مع الفيفا، هم ناجحين يأجلوها لـ حد دلوقتي، بس لـ حد إمتى؟ الله أعلم.
المشكلة إن المادة 18 من اللائحة الأساسية لـ فيفا، بـ تعمل إيه؟
“تلزم الدول المطبقة لدوريات المحترفين بضرورة عدم وجود أكثر من ناد يمثل هيئة واحدة، بالإضافة إلى ضرورة تمثيل الشركات المساهمة بناد واحد فقط وإبعاد الشركات غير المساهمة، فضلاً عن تمثيل الشركات القابضة بناد واحد تطبيقاً لمبدأ السلامة”
كده بقى القوات المسلحة المصرية ما ينفعش تشارك بـ تلات أندية زي ما هو حاصل دلوقتي: طلائع الجيش وحرس الحدود والإنتاج الحربي، وأكيد هم مش عايزين يستغنوا بـ بساطة عن وجود الأندية دي، لـ أسباب مش هنا مجالها، بس هي واضحة يعني.
حتى لو فرضنا إنهم ضحوا بـ الإنتاج الحربي، يفضل طلائع الجيش وحرس الحدود، من هنا بـ تيجي أهمية قصة ربط حرس الحدود، بـ نادي “السواحل” القديم، والسنة اللي فاتت، لما زاد الضغط على حكاية المادة 18، وضرورة تطبيقها، طلع العقيد مؤنس أبو عوف (كان عقيد ساعتها، زمانه اترقى) بـ تصريح عظيم.
وأبو عوف، علشان نبقى عارفين، هو نائب رئيس جهاز الرياضة العسكري، والتصريح كان إنه مين قال إن حرس الحدود نادي عسكري؟ ده نادي مدني ابن مدني، مدني أبا عن جد، مدني من سنة 1934.
وكان نص التصريح اللي قاله العقيد لـ جريدة البديل الإلكترونية:
“إن نادي حرس الحدود مدني خالص ولا يتبع القوات المسلحة، وتم إنشاؤه عام 34 تحت اسم «غفر السواحل»، من خلال الموظفين المدنيين والأجانب التابعين لغفر السواحل، والمسماة بحرس الحدود حالياً، وبالتالي لا يوجد مشكلة مطلقًا.”
انتهت تصريحاته، بـ كلمة “مطلقا”، لا توجد مشكلة “مطلقا”.
أيوه بس حضرتك مجلس إدارة النادي ده، هل بـ ينتخبه الأعضاء المدنيين ولاد المدنيين التابعين لـ مؤسسة “خفر السواحل” اللي هي حرس الحدود؟
بسم الله الرحمن الرحيم:
الإجابة: لأ بـ ييجوا بـ التعيين، واللي بـ يعينهم وزير الدفاع شخصيا، ورئيس النادي لوا في القوات المسلحة، ودايما تصريحات القائمين بـ ما في ذلك الأجهزة الفنية، إن النادي هو تاني أكثر الأندية انضباطا (بعد طلائع الجيش طبعا) بـ فضل الإدارة العسكرية، كما إن النادي من الناحية القانونية مملوك لـ حرس السواحل، بس هو في الآخر نادي مدني، مدني منتخب هههههههههههههه.
بس الحكاية دي ممكن تشتغل، والإنتاج الحربي يبقى نادي مدني لـ المدنيين ولاد المدنيين العاملين في وزارة الإنتاج الحربي، واتحاد الشرطة هـ يبقى مش تبع الداخلية، أو الداخلية مش تبع الشرطة، أو الداخلية مش تبع وزارة الداخلية، واتحاد الشرطة مش تبع هيئة الشرطة، وأكيد أكيد “بترو”جيت مش تبع “البترو”ل، ده نادي لـ المدنيين ولاد المدنيين من أبناء بلد الغريب، السوايسية.
كل حاجة تنفع في مصر
إيه ده ما اتكلمناش عن الكورة، ولقاءات حرس الحدود مع الأهلي
الحقيقة ماليش نفس
ثم إن الأهلي دلوقتي بـ يتغلب
لسه هـ يلاعبونا تاني كتير، خلينا نتكلم عن الكورة في ظروف أحسن
فتكم بـ عافية