مؤمن المحمدي يكتب: بالمناسبة (9) إنتاج صحيح بس حربي

 

يوم 22 أبريل 2009، كان فيه مباراتين في دوري المظاليم، المباراتين دول هـ يحددوا مين الفريق اللي هـ يصعد لـ الدوري الممتاز، المباراة الأولى بين النصر وأسمنت السويس، والتانية بين الإنتاج الحربي وجاسكو.

المنافسة كانت بين النصر والإنتاج الحربي، النصر فريق عريق عتيق، كفاية أقول لك إن ده النادي اللي طلع منه بيبو، محمود الخطيب، أسطورة الأساطير، وفضل يلعب فيه حبة لـ حد ما راح الأهلي. أما الإنتاج الحربي فـ ده نادي تأسس سنة 2004، عارف يعني إيه؟ يعني فـ خمس سنين من تأسيسه، بقى بـ ينافس ع الصعود لـ الممتاز، ده نادي اتأسس علشان يلعب فـ الممتاز، ولولا الملامة يا هوا لولا الملامة، كان لعب فيه على طول، الإنتاج الحربي بقى.

لـ حد الدقيقة 80 من المباراتين المذكورتين كان النصر متقدم 2/صفر، وجاسكو متقدم على الإنتاج 2/ صفر، والنتيجتين دول يخلوا النصر فـ الممتاز، والإنتاج الحربي السنة الجاية بقى. بس على مين.

طبعا حضرتك مش هـ تندهش لما تعرف إنه فجأة أسمنت السويس جاب جونين فـ النصر، والإنتاج جاب جونين في جاسكو، فـ بطاقة الصعود تحولت من النصر لـ الإنتاج.

طيب، لو قلنا إنه حصل لعب في ماتش الإنتاج وجاسكو، حكام أو تفويت أو غيره، إيه اللي حصل في ماتش النصر؟

مش بـ الضرورة يكون في الماتش ده تحديدا، بس في ماتشات الدرجة التانية العادة دي موجودة من زمان، يبقى فيه فريق تحت مقطع الدنيا، وواخد الفرق فحت وردم، وصعوده مسألة وقت، وفجأة يخسر ماتشات غريبة، خصوصا الماتشات الحاسمة، والمباريات الفاصلة ويفضل تحت، ليه؟

اللاعيبة بتاعة الفرق دي اللي كان أشهرهم “النصر” و”الشرقية للدخان” بـ يفضلوا عدم الصعود لـ سببين: الأول إن النادي من دول لما هـ يصعد، أول حاجة هـ يعملها إنه يروح مشتري له عشرة خماشر لاعب من الممتاز، فـ يسرح اللاعيبة دي.

فـ اللاعب يحسبها، أنا دلوقتي وضعي مستقر فـ النادي، ولو ليه شركة فـ أنا تمام، عندي عقد ومش بـ أروح الشغل، لما يكون عندي وضع مستقر زي ده، إيه اللي يخليني أغامر لو سرحوني، وأقعد أدور على شركة تانية؟

السبب التاني، إننا هـ نطلع الممتاز، ولو كنت من المحظوظين وما سرحونيش، فـ الفريق كـ كل هـ يعمل إيه؟ هـ يكسب كل كام ماتش، عادة عقود اللاعيبة دي كلام فاضي، وعايشين على مكافآت الفوز والتعادل، فـ إحنا تحت بـ نكسب كتير، جوه وبره، وكل مكسب بـ مكافأة، حتى لو قليلة بس مضمونة وشغالة، إيه اللي يخليني أطلع الممتاز، وأول ماتش أكسبه مثلا يبقى فـ الأسبوع السادس.

فيه سبب تالت، بس ما علينا.

طب وليه لاعيبة الإنتاج الحربي ما يعملوش كده ليه؟

مش بـ مزاجهم، ده الإنتاج الحربي، إنتاج صحيح بس حربي، واللي كان رئيس النادي، ورئيس الحتة دي من الدولة، سيد مشعل، الدكتور سيد مشعل، وزير الدولة لــ الإنتاج الحربي 12 سنة، ولولا 25 يناير كان ممكن يبقى وزيرها لـ حد دلوقتي.

سيد بيه مشعل محتكر مجلس الشعب عن دايرة حلوان فـ نفس الـ 12 سنة اللي كان فيهم وزير، ومش بت التزوير لا سمح الله، هو كده، ربنا خلق كده، وزير في السلطة التنفيذية، ونائب فـ السلطة التشريعية، ورجل فـ جيم الجامعة، ورجل في جيم الجيش، واحد عنده رجلين زي دول، ما يبقاش عنده فريق كورة بـ يلعب فـ الممتاز، إنت بـ تهزر؟

صعد الإنتاج الحربي لـ الممتاز، ومسكه طارق يحيى أول موسم خد بيه السابع، خلينا نشوف ماتشاته مع الأهلي الدور التاني بقى تابعونا.

الصفحة الرسمية للكاتب مؤمن المحمدي

اقـرأ أيضـاً:

مؤمن المحمدي يكتب: بالمناسبة (8) بيبة والصعيد مات

مؤمن المحمدي يكتب: بالمناسبة (7) المستكاوية

مؤمن المحمدي يكتب: بالمناسبة (6) حرس الحدود يا أهل الله

مؤمن المحمدي يكتب: بالمناسبة (5) الخواجة سموحة

مؤمن المحمدي يكتب : ألف مشهد ومشهد (72) إخراج خالد يوسف

مؤمن المحمدي يكتب : ألف مشهد ومشهد (71) الأستاذ والتلميذ

مؤمن المحمدي يكتب : ألف مشهد ومشهد (70) عفاف وشحاتة

مؤمن المحمدي يكتب : ألف مشهد ومشهد (69) هاني شنودة

مؤمن المحمدي يكتب : ألف مشهد ومشهد (68) “غريب” في حياتي

مؤمن المحمدي يكتب : ألف مشهد ومشهد (67) بيبو والغريب

.