رسالة مؤثرة من وسام بريدي لأخيه المتوفي - E3lam.Com
قام الإعلامي وسام بريدي بنشر رسالة مؤثرة ، كتبها لأخيه الذي توفى بحادث سير، في إبريل الماضي، وذلك على صفحته الرسمية في موقع التواصل الاجتماعي “فيسبوك”.
وقد جاء في رسالته: “أنا بحياتي ما قلت إنه الحلم هو طريق عابر، الحلم انت بتوصله يعني أحلامك بالحياة ما ممكن تتحقق إلا إذا إنت سعيتلها، ولا نهار بحياتي اعتبرت إنه الحلم لازم يِجي صدفة، بِمجهود شخصي بتِقدر تحقق كل أحلامك”.
وتابع: “كِل الأحلام فيها تتحقق، لأنه الإنسان بداخله كل شي موجود، قدي هو عنده قدرة إنه يطلع هالشي الموجود ويضَوّي عليه بحياته، قدي أحلامه بتقدر تتحقق، أنا لا اؤمِن فقط إنه الحلم هو شي عَبَثي مامنقدر نوصله بطريقة عبثية من دون ما نعمل أي مجهود”.
وأضاف: “ما بحياته طُموح الإنسان بيوقف، ولا بحياتك رح تقول أنا اكتفيت وأنا وصلت لمطرح وخلص، كِل ما إنت بتكبر مع الحياة، كل ما أهدافك بتختلف، الإنسان أقوى مخلوق خلقه ربنا على هيدي الأرض، إذا ما قدرنا نطبق الأمل والتفاؤل بحياتنا ما عنا خيار، يا منطبقهُن يا رح نعيش بيأس كل حياتنا، هيدي حياتنا ما بحياتها رح تكون وما بحياتها رح تتغير إلا إذا نحنا قررنا إنه نغيرها”.
ثم قال : “أنا ضد فكرة إنه الإنسان يبني حياته على الحظ، إنت بتخلق حظك بالحياة، مجهودك بالحياة هو اللي بيِعطي، الأهم من كل شي نعرف كيف نتواصل مع اللي غادَرونا من هيدي الدني، نعرف كيف نخليهُن عايشين معنا، صلاتي منّها كلام بردده، صلاتي هي عيش بعيشه مع كل يوم مع ناس بحياتي، بِدمعوا عيوني وبغرغروا، بحس هيدي هي طريقة التواصل، هيدي هي اللحظة اللي عصام بِيقلي فيها أنا بحس فيك، وقت ما يحطلي هالدموع بعيوني. هيدي كل إنسان لازم يعتبرها إنه هيدي لغة التواصل، هيدي طريقة التواصل بينك وبين الشخص اللي غادرك على هيديك الدني ما رح تقدر تحكي إنت وياه بالحكي، ما في شي بيقدر يخليك تكفي وتستمر بهالحياة إلا إيمانك، إيمانك وصلاتك اللي هي أساس لقاءك مع الآخر. الحياة بتضوّيلك على قصص كثير مهمة، ضوّتلي على حالي، إنه ما بحياتك بتقدر ترسم الشي اللي إنت بدك ترسمه ويبقى مستمر، يعني الأهم من هيدا كله هي مش وقت ما بتوقع بمصيبة، المهم إنه إنت كيف تعالج هيدي المصيبة، وقتها بتحول الألم لفرح إيمانك، ما ممكن شي يقدر يعوضك عن هيدا الفرح”.
يذكر ان عصام هو شقيق مقدّم البرامج التلفزيونية وسام بريدي، من مواليد عام 1980 في بلده فيطرون، ودرس التمثيل في “معهد الفنون الجميلة” في الجامعة اللبنانية واخذ دور البطوله في مسلسل “ادم وحواء”، وعمل في مجال المسرح والسينما والتلفزيون، بالاضافه الي انه درس الموسيقي (الغناء الشرقي) في المعهد العالى للموسيقى، وتخرّج من برنامج “ستوديو الفن” عام 2001 عن فئه الاغنيه الطربيه العربيه.
