مؤمن المحمدي يكتب: بالمناسبة (10) السيد فتحي Vs كمال ريشة
نادي اتحاد الشرطة اللي الأهلي هـ يلاعبه النهارده، مش هو نادي الشرطة اللي لعب الدوري فـ السبعينات وانسحب، وما كملش المسابقة، النادي بتاع النهارده تأسس سنة 1980، حاجة كده زي حرس الحدود والسواحل، واتكلمنا فـ القصة دي.
اتحاد الشرطة بقى صعد لـ الممتاز سنة 2008، ولعب أول موسم له 2008/ 2009، وأول لقاء بينه وبين الأهلي، اتحاد الشرطة كسب 1/ صفر بـ هدف من ضربة جزاء، وآهي المباراة دي هي موضوعنا.
أصل الصراحة الواحد زهق من قصة شكوى جمهور كل نادي إن فريقه بـ يخسر من الحكام، آدينا أهو بـ نتكلم عن نفس الموسم، مباراتين شهيرتين جدا، الأولى الأهلي والشرطة، والتانية الأهلي والجيش، وما بين الشرطة والجيش حصلت معارك لسه ما خلصتش لـ النهارده.
في ماتش الشرطة الأهلي خسر 1/ صفر، وكان الحكم السيد فتحي، وكان الكلام عن تعمد فتحي خسارة الأهلي، على أساس إنه ألغى هدف صحيح لـ فلافيو (الهدف سليم 100%) وإنه ما حسبش ضربة جزاء لـ أبو تريكة (واضحة وضوح الإبل) وحسب ضربة جزاء مش سليم لـ الشرطة جه منها الهدف.
ثم إن السيد فتحي طلع في نهاية الموسم على التلفزيون، وقال من خلال برنامج “إسمعلاوي” على قناة مودرن سبورت، إنه إسماعيلاوي، ونفسه الإسماعيلي يكسب الدوري.
تمام.
في ماتش الجيش، الأهلي كسب 3/1، والحكم كان كمال ريشة، والكلام إن ريشة تعمد فوز الأهلي، اللي كان متأخر بـ هدف، وسجل له هدف التعادل أبو تريكة، والهدف كان من فاول عليه (واضح وضوح التنين)، واللي زود الصعوبة إنه ده كان آخر ماتش، ولو الأهلي خسر أو اتعادل الإسماعيلي خد البطولة.
مين عنده حق؟
قناعتي الشخصية، وأنا حر فيها، إنه لا السيد فتحي تعمد خسارة الأهلي، ولا ريشة تعمد فوزه، لـ عدة اعتبارات:
أولا، الكور كلها المذكورة ملتبسة، حتى لو الإعادة بينت إنها واضحة، الحكم ممكن ما يشوفش الكلام ده، وهدف فلافيو الملغي في ماتش الشرطة مسئولية مساعد الحكم، الحكم مالوش دعوة، المساعد رفع قبل الكورة ما تدخل، عايز الحكم يعمل إيه يعني؟
أما ضربات الجزاء، فـ يا راجل، كبر مخك، دي أصعب حاجة فـ الدنيا، وكذلك فاول أبو تريكة، عشرين لاعب فـ منطقة الجزاء، وكورة ضالة، طبيعي الحكم ما يشوفش الزقة.
ثانيا، الأهلي لاعب الشرطة في الدور التاني، ومكنش السيد فتحي موجود، والأهلي برضه ما سجلش، واتعادل وخسر نقطتين، مين كان السبب؟ أما في ماتش الجيش، فـ الأهلي ما كسبش بـ جون أبو تريكة، كسب بـ جون أحمد فتحي، اللي جه فـ الدقيقة 92، إيه دخل ريشة، ولو ما جاش جون فتحي، ريشة كان هـ يعمل إيه؟
الفكرة إن لعبة هنا، فاول هناك، زقة كده، مش هي اللي بـ تخلص الماتشات، وده ما ينفيش إن الحكم يلام على عدم لياقته وجاهزيته، بس دي قصة تانية خالص.
ثالثا، إعلان الحكم لـ انتماؤه طبعا حاجة غلط، وما يصحش كده، بس قول لي والنبي كده اسم تلات حكام مالهمش انتماءات أو مصالح أو تربيطات، دي هي أوضه وصالة، الفكرة مش في الانتماء، إنما في تأثير ده.
لكن هـ أفترض إن ده صح وده صح، والأهلي خسر ماتش بـ تعمد من حكم، وكسب ماتش تاني بـ قصد من حكم تاني، ما موزونة أهي، ده ما يبرأش الحكام، لكني كـ واحد من الجمهور، مقتنع إنها موزونة، ومهما كان فُجر الحكم، آخره كورة ضالة، والدوري بـ يبقى 30 أسبوع وأكتر، فـ المسألة أعقد من مجرد لعبة مشكوك فيها، وفـ الموسم المذكور، الأهلي لاعب منافسه الإسماعيلي ماتش فاصل، بـ حكم أجنبي، وكسب 1/ صفر بـ جدارة، علشان كده استحق اللقب.
وبـ المناسبة: الحكم الأجنبي ده ما سلمش برضه، لـ إنه لغى هدف لـ الأهلي، وهدف لـ الإسماعيلي، إيه رأيك بقى؟
يا ريت كان ممكن الفرق تكسب بـ الحكام، كانت بقت سهلة، بس هي مش كده