مؤمن المحمدي يكتب: بالمناسبة (12) الدوري اتلغى

الشرطة ليها فريق في الدوري، والداخلية ليها فريق في الدوري، وده منتهى الظلم، لـ إنه كده الأمن الوطني من غير تمثيل في اللعبة الشعبية الأولى، لا هو ولا الأمن المركزي، بس أكيد ملحوقة السنين الجاية.

المهم، الداخلية صعد الممتاز موسم 2011/ 2012، وزي ما حضرتك راسي دي كانت أول سنة يلغوا الدوري بعد انتظام دام 22 سنة، هـ نتكلم عن إلغاءات الدوري ومشاكلها، بس أقول لك الأول إنه بـ سبب إلغاء الدوري الموسم ده، والموسم اللي بعده، بقت لقاءات الأهلي والداخلية الرسمية، بس 4 مباريات: اتنين في 2014، واتنين في 2015.

أول موسم “رسمي” الداخلية غلبت الأهلي رايح جي 1/ صفر، ودي من النوادر في الدوري عموما، الدور الأول تمساح والتاني لاما كولين، والاتنين مشيوا من الداخلية، تاني موسم الأهلي فاز رايح جي 1/صفر رمضان صبحي، و2/ صفر متعب وسعيدو.

فـ الماتش بتاع رمضان صبحي، جري بعد الهدف، وزمايله قعدوا يمسكوا فيه، واضح إنهم كانوا عايزين يمنعوه من حاجة، واللي كان باين إنه عايز يروح يعترض على فتحي مبروك، إكمنه كان مقعده احتياطي ثم لما نزل جاب الجون في آخر ربع ساعة.

بس هو اللي حصل مش كده، اللي حصل إن رمضان صبحي كان لابس تي شيرت تحت فانلة الفريق، كاتب عليه “أبو تريكة خط أحمر” علشان وقت إقامة المباراة كان فيه حالة من الهجوم على تريكة، كلنا عارفينها، فـ اللاعيبة كانت خايفة على صبحي يتوقف أو كده، فـ ما خلوهوش يرفع التي شيرت.

نرجع بقى لـ حكاية إلغاءات الدوري، وكل ما تيجي مناسبة هـ نتكلم عن سنة وقف فيها الدوري، وليه، بس مبدئيا عايزين نقف عند مشكلة كبيرة تخص الموضوع ده.

دلوقتي، الإحصاء الرياضي ما بقاش بس وسيلة لـ سرد التاريخ، والتفاخر بـ الأرقام، الإحصاء بـ يأثر على التصنيف، والتصنيف بـ يفرق في كل حاجة، بـ يوصل حتى إنه بـ يأثر على القرعة، أو حتى حاجات زي أسعار الرعاية وما إلى ذلك.

طيب، إحنا هنا في مصر مش حاسمين الأمر فيما يتعلق بـ المباريات اللي اتلعبت في مواسم ملغية، والأهداف اللي دخلت فيها، وهكذا، هل هي كمان ملغية، ولا محسوبة؟

يعني مثلا مثلا، لو أنا عايز أقول الأهلي سجل كام هدف في الدوري من ساعة انطلاقه لـ دلوقتي، أقول كام؟

أفتكر سنة 2005، حصلت خناقة بـ سبب موضوع زي كده، لما بركات سجل هدف لـ الأهلي لـ الإسماعيلي في ماتش 6/ صفر، والكل اتكلم وقتها على إن ده الهدف رقم 2000 لـ الأهلي في الدوري، بس كان فيه رأي تاني إنه لأ، الأهلي مسجل أكتر من كده بـ اعتبار احتساب الأهداف المسجلة في السنين الملغية.

اترد على ده بـ إنه السنين الملغية ملغية، فـ خلاص، فـ اترد ع الرد إنه لما السنين الملغية ملغية ليه بـ نحسب مثلا لقاءات الأهلي والزمالك، فـ نحسب المباريات اللي لعبوها في السنين دي، ولما بـ نيجي نحسب أهداف أي لاعب، اللي دخلوا نادي المئة أو ما دخلوش، ليه بـ نحسب أهدافه في السنين دي، ولما بـ نيجي نحسب مواجهات أي فريقين، فـ اترد على الردود بـ إنه خلاص ما نحسبهاش، بس في النهاية ما وصلناش لـ حاجة.

طبعا اتحاد الكورة في البلالا، هم أصلا معندهمش أي أرشيف أو تاريخ أو وثائق، كله اجتهادي، وأذكر إني سنة 2008 كنت عايز أعمل حاجة خاصة بـ الإحصائيات، وكلمت حد كلم حد، ووصلنا لـ سمير زاهر، فـ قال لك إحنا ما عندناش الكلام ده.

بس متهيألي بقى فيه ضرورة لـ حاجتين: الأول يتعمل معهد إحصاء مصري، والتاني نحسم الأمور المتعلقة اللي زي دي، علشان لو ده حصل متهيألي فيه حاجات من “ثوابت” التاريخ  هـ تتغير.

وكل ما تيجي حاجة، نبقى نقول عليها

الصفحة الرسمية للكاتب مؤمن المحمدي

اقـرأ أيضـاً:

مؤمن المحمدي يكتب: بالمناسبة (11) بيب بيب أهلي 

مؤمن المحمدي يكتب: بالمناسبة (10) السيد فتحي Vs كمال ريشة

مؤمن المحمدي يكتب: بودرة عماد متعب

مؤمن المحمدي يكتب: بالمناسبة (9) إنتاج صحيح بس حربي

مؤمن المحمدي يكتب: بالمناسبة (8) بيبة والصعيد مات

مؤمن المحمدي يكتب: بالمناسبة (7) المستكاوية

مؤمن المحمدي يكتب: بالمناسبة (6) حرس الحدود يا أهل الله

مؤمن المحمدي يكتب: بالمناسبة (5) الخواجة سموحة

مؤمن المحمدي يكتب : ألف مشهد ومشهد (72) إخراج خالد يوسف

.