بسبب بائعو البطاطا.. نشوى مصطفى: كنت بشتغل في العتبة - E3lam.Com
ردت الفنانة نشوى مصطفى على الهجوم الذي لاقته من بعض نشطاء موقع التواصل الاجتماعي “فيس بوك”، بسبب نشرها صورة لشباب يبيعون البطاطا في أحد مناطق القاهرة.
وقالت نشوى “طيب بمناسبة اني شيرت صورة لشباب زي الورد بيبيعوا بطاطا وقلت عفارم عليهم انهم ماستسلموش للاحباط وللبطالة ولا قعدوا يولولو ويشتموا في البلد.. ونتيجة للردود اللي بعضها سخيف وبيقولو لي انتي فنانة بتاخدي فلوس اد كده ومش حاسة بالشباب المحبط وعايزانا بعد مانتخرج من كلياتنا المحترمة نبيع بطاطا.. ونتيجة رسايل الشتيمة في الانبوكس.. عايزة اقول لهم أولًا ابويا الله يرحمه كان من الطبقة الكادحة الطبقة تحت المتوسطة بشوية كتير.. ابويا رباني اني اكون راجل.. بمعنى اني لما اتخرجت ومالقتش شغل عملت وجبات جاهزة في البيت وبعتها في العتبة للبياعين اللي بيشتغلوا في محال الملابس، ليه العتبة بالذات، لأني في إجازات الصيف بتاعة الجامعة كنت بشتغل بياعة في المحال دي علشان يكون معايا فلوس زيادة عن المصروف اللي باخده من أهلي”
وتابعت نشوى قائلة: “ليه عملت وجبات جاهزة وبعتها؟؟؟ لأني كنت عايزة ادرس تمثيل، دخلت المعهد وابتديت تمثيل بعشر مشاهد في ضمير ابله حكمت وكان اجري في المسلسل كله ٢٥٠ جنيه، كنت ساكنة في شبرا بيتنا اوضتين، دلوقتى بفضل ربنا وبمجهودي انا ساكنة في فيللا دورين بحمام سباحة في أرقى مكان في التجمع الخامس”
واختتمت: “تعلمت في مدارس حكومة وكنت باخد الكتب ببلاش في الجامعة لأنى كنت مقدمة مفردات مرتب والدي انها بسيطة، دلوقتى بفضل ربنا وبمجهودي ولادي في جامعة أمريكية وألمانية، ماحدش ساعدني غير ربنا مافيش منتج دعمني واداني بطولة وانا استاهلها بجدارة، أثبت اني بمشهدين تلاته ممكن اسيب تأثير واحقق نجومية باشوفها في كلام معجبيني في كل مكان جوه مصر وبراها، انا بشتغل بمجهودي، اتحاربت وصمدت اتساومت ومااستسلمتش لأني مؤمنة بحلمي ومؤمنة بأن ربنا مع اللي بيتعب….. حارب علشان حلمك وماتشتمش بلدك ولا ظروفك ولاتشتم الممثلين”.
