"أمين" يطالب بإنشاء صندوق لرعاية أسر شهداء الجيش والشرطة
طالب تامر أمين مقدم برنامج “الحياة اليوم” بإنشاء صندوق لرعاية لأسر شهداء ومُصابي الجيش والشرطة على خطى صندوق رعاية أسر وشهداء ثورة 25 يناير، مُشيراً أن هناك الكثير من أسر شهداء ومصابي الثورة يأخذون مكافأت شهرية لا يستحقونها، مُضيفاً: “في كتير أخد شهادة بأنه مصاب من مصابي الثورة وهو ماسك مطواة وحاططها على رقبة موظف الصحة، والكلام ده حصل وأنا شاهد عليه”.
وتابع “أمين” خلال تقديمه حلقة اليوم من برنامجه الذي يُعرض على قناة الحياة، موجهاً حديثه للمسئولين: “انتوا مش عملتوا صندوق لأسر شهداء ثورة 25 يناير؟!، أنا مش بقلل من قيمة ثورة يناير، هي مش الناس اللي نزلت في الثورة كانت تدافع عن بلدها برضه، لكن فين الشهداء وأسرهم اللي بجد؟! أخرهم ربنا يصبرهم وخلاص”.
واستطرد: “الكلام دة مش هينفع، لأن كل يوم الوطن بيقدم شهداء من الشرطة والجيش وماينفعش نكون ناكرين للجميل، اعملوا صندوق لشهداء الشرطة والجيش لازم ابن الشهيد يحس بالبطولة اللي والده عملها من خلال التكريمات اللي سيحصل عليها من الدولة والرعاية الصحية والتعليمية الجيدة”
وأشار أمين إلى أن الاهتمام بالشهداء سيقل سريعاً، مُضيفاً: “الحقيقة احنا بنطبطب عليهم وعلى أسرهم النهاردة بس، ووزير الداخلية بيفتكرهم النهاردة بس، وراح وسلم على ولادهم وقبَّل رأس ابن أحد الشهداء، وخلصت القصة، بمعنى انها خلصت فعلاً، واحنا كإعلام خلاص بننساهم ومن بكرة هيكون عندنا أخبار تانية، وهيبقى عندنا أخبار الشيخ ميزو وأخبار الفنانة مش عارف مين ودول هيتنسوا”
لافتاً إلى أنه يخشى أن يكون اهتمام وزارة الداخلية فقط بالجنازة العسكرية والورود فقط ونسيان الشهداء فيما بعد، مُضيفاً: “واحنا كمان كمجتمع ورأي عام بنقعد نمصمص شفايفنا ونقول لا حول ولا قوة الا بالله وشكراً وكل واحد بيلتفت لحاله”.