مؤمن المحمدي يُرشح 14 كتابًا لزوار معرض الكتاب
ترتيب الكتب هنا مش مقصود
ولا حتى دي اختيارات نهائية
إحنا بس بـ نوصي بعض على بعض
تحياتي
1 المحظور على الشاشة لـ أحمد شوقي
كتابات شوقي في السينما عموما تستحق القراءة والاقتناء، هو واحد من الناس اللي عارفين هم بـ يعملوا، عنده الوعي وكل الأدوات، بـ يعيد الهيبة والاعتبار لـ فكرة الناقد، وهو من القليلين اللي بـ يعملوا كده.
بس أنا كمان مستني الكتاب ده علشان موضوعه، هو واخد تجارب خمس مخرجين من جيل التمانينات: داوود عبد السيد، محمد خان، عاطف الطيب، خيري بشارة، رأفت الميهي، وبـ يرصد ازاي اتعاملوا مع “التابو” من خلال أفلامهم.
حاجة مهمة يعني
2 تلال الأكاسيا لـ هشام الخشن
من زمان ما قريتش رواية بـ العذوبة والجمال والإحكام دول، وضروري يتعمل لها سيناريو فيلم، هـ أكتب عنها بـ استفاضة قريب.
3 دكتور طوارئ لـ يحيى قدري
عرفت يحيى سنة 2009 كـ شاعر، وهو شاعر مدهش بـ النسبة لي، وبـ يكتب من المنطقة المفضلة لـ ذائقتي، والكتاب ده أتوقع مليان قصايد، مع إنه مش ديوان شعر بـ المرة، ده كتاب يحيى بـ يحكي فيه من خلال تجربته كـ طبيب طوارئ في مستشفى.
هـ يقول لنا ازاي عايش حالات إنسانية مريعة، كان أكتر جزء مأساوي فيها إنها بـ تتعامل عادي، هنا بـ يدوب الخيط الفاصل بين الموت والحياة، وبـ تطلع الأسئلة الوجودية لـ وحدها.
هـ أقتنيه مؤكد
4 خربشات عزيزة لـ سامية أبو زيد
شهادتي مجروحة في الكتاب لـ عشرميت سبب، أنا منحاز لـ سامية أبو زيد كـ كاتبة، منحاز لـ الحكي عموما، منحاز لـ الكتابة عن في المناطق غير المطروقة، وهي هنا بـ تحكي تجربتها مع القطط، كتابة ممتعة لـ كاتبة جادة.
مش بس كده، لكن كمان شهادتي مجروحة في الكتاب، علشان هو من إصدارات “بتانة”. وبس، مش هـ أكتر في الكلام.
5 كنت صبيا في السبعينات لـ محمود عبد الشكور
فيه سببين يخلوني أحرص على اقتناء الكتاب ده، الأول محمود نفسه، هو ناقد سينمائي مرموق، وحتى لو الكتاب مش في السينما، لكن لغة عبد الشكور الممتعة، وعينيه اللي بـ تلقط التفاصيل، يخلوني أحب أقراله عموما.
السبب التاني هو “دار الكرمة”، أنا عارف إن الكرمة مش بـ تطلع كلمة من غير تدقيق وحرص على حاجات كتير، أهمها إن مستوى المعروض يبقى في أعلى جودة ممكنة.
الموضوع واضح من عنوانه، وأعتقد إنه هـ يلعب لعبة الربط بين الخاص والعام، واللعبة دي في الكتاب من التكنيكات المفضلة بـ النسبة لي.
6 نجاة الصغير لـ رحاب خالد
المفروض إن الكتاب فيه كل حاجة عن نجاة، كل حاجة كل حاجة، أكيد ده هـ يكون من أوائل الحاجات اللي أنا أشتريها، وأعتقد إنه أي سميع أو مهتم بـ الأغاني هـ يبقى كمان مهتم.
الكتب اللي في المنطقة دي فعلا قليلة
7 “فيصل – تحرير” أيام الديسك والميكروباص لـ حمدي عبد الرحيم
الكتاب ده صدر 2009، وهـ أكتب عنه بـ استفاضة الاستفاضة، بس فعلا فيه كم من المتعة والشجن والحكي والشاعرية والمرارة والفرح والرومانتيكية، اللي نادرا ما تجتمع في كتاب واحد.
الكتاب صدر من مدبولي، لو لقيته اوعى تسيبه، ولو لقيت أي حاجة تانية لـ حمدي، برضه ما تسيبهاش، دور على “ليلة دخلة شيماء” و”سأكون كما أريد”.
8 الإمام الشافعي وتأسيس الأيدلوجية الوسطية لـ نصر أبو زيد
بص، أنا عارف إنه كتاب تقيل أوي، ولغته صعبة، وكل حاجة، بس صدقني، هو يستاهل أي جهد تبذله علشان تفهمه، الكتاب ده لو كان اتاخد بـ جدية وقت صدوره، كنا وفرنا على نفسنا حاجات كتير لا تحصى، بس معلش، ملحوقة، دور عليه وهاته، وهات معاه كمان “مفهوم النص”، تبقى إنت عملت الصح مع نفسك.
9 الجذور التاريخية للشريعة الإسلامية
خليل عبد الكريم بقى، كتاب صغير في غاية الأهمية، بـ يشرح فيه كل حاجة جت ازاي ومنين، مدهش الراجل ده.
10 ديوان المتنبي
لو مكنش عندك، ما ينفعش ما يبقاش، ويا ريت تدور على شرح أبو العلاء المعري، اللي سماه “معجز أحمد”، اقرا وانبسط وادعي لي.
دول عشر كتب، وإحنا قلنا 14، أيوه، ما أهو أنا مش هـ أعمل فيها عفيف، وما أوصيكش على حاجاتي بقى: كل العواطف، ليالي قريش قبل الميلاد، ليالي قريش قبل الدعوة، حكايات المحمدي.