مؤمن المحمدي يكتب: بالمناسبة (18) حمدي جمعة جي من بعيد
والكابتن حمدي جمعة كان من لاعبي الأهلي الموهوبين، من كتر موهبته هيديكوتي مكنش بـ يلاعبه كتير، يمكن كان خايف عليه من الحسد، عموما هو ما طولش فـ الأهلي، ولا في الكورة، وعلى حد معلوماتي، فاتح محل إكسسوارات في فيصل.
ومع إن حمدي مكنش بـ يلعب بـ استمرار، بس كان بـ يلعب ماتشات الزمالك، ودي حاجة غريبة، بس ربك بقى لما يريد. والكابتن له ذكرى مهمة في ماتشات الأهلي والزمالك، في موسم 1979/ 1980، من أقدم الحاجات اللي أفتكرها،
في الماتش المذكور، كان يوم 3 مارس 1979، ماتش الدور الأول، اختاره الكابتن هيدكوتي لـ التشكيل، فـ تأهب اللاعيبة، وبدؤوا يقفزوا، وهو اكتشف مفاجأة مش ظريفة، هي إن فردتين الكوتشي بتوعه شمال، أصلا هو مكنش لاقي الجزمة، وطلب من عم حارث يدور له عليها، فـ غالبا جاب له أي حاجة لقاها.
وقتها مكنش فيه رحرحة النهارده، وأطقم بقى وزي ما إنت عايز، فـ هو لو قال لـ هيديكوتي كده، عادي، هـ يلعب حد مكانه، فـ لازم محدش يعرف، بس هو ه يلعب ازاي بـ الفردتين الشمال؟
عادي يعني، هـ يلعب بيهم، وزي ما تيجي تيجي.
الفكرة إنها جت، جت أوي، جت بـ زيادة.
كورة على حدود الـ 18 بتاعة الزمالك، بس متطرفة ناحية الشمال، مدافع الزمالك عمل فاول، الفاول ما يتشاطش مباشرة، الطبيعي إنها تترفع جوه المنطقة، بس مين اللي راح لها، راح لها بيبو، فـ تعامل معاها بـ منتهى الذكاء. لعبها أرضية حنينة لـ ورا شوية، بـ حيث اللي جي من ورا يقابلها بـ تسديدة في الجون.
طبعا الفكرة حلوة، بس دي عايزة حد دقيق في التسديد، رجله مظبوطة على المرمى، لـ إنه هـ ياخدها مرة واحدة في البعيدة، ولازم يكون بـ يلعب بـ اليمين، يعني عايزة الخطيب يباصيها لـ نفسه مثلا، مكنش لسه طاهر أبو زيد ولا علاء ميهوب طلعوا، وطاهر كمان أشول.
المهم، مش هـ أطول عليك، اللاعب اللي المفروض يشوط الكورة دي كان لازم يبقى أي حد غير الكابتن حمدي جمعة، بس ما تفهمش القدر يا أخي وتصريفاته، اللي قابلها كان حمدي جمعة، وكان بـ يعلق ع الماتش ده إبراهيم الجويني، وقال لك حمدي جمعة جي من بعيد.
كـ أهلاوي، دي حاجة ما تطمنش، إنما إنت أكيد متوقع إيه اللي حصل. شاطها حمدي شوطة باكاتي، هو شاطها بـ اليمين، وهو لابس الفردة الشمال، فـ بدال ما تروح فـ المدرجات، زي ما هو مفروض، لبست وعملت “سكرو” وراحت في المقص الشمال، عالمية، الجون الأول لـ الأهلي.
صحيح الزمالك اتعادل بعدها بـ دقيقتين، والماتش انتهى تعادل، بس الجون ده يفضل من الحاجات المهمة.
موسم 1981/ 1982 بقى، كان فيه لاعب برنس في الأهلي اسمه محمد عامر، من الحاجات القليلة اللي تفتكرها له، في ماتشات الأهلي والزمالك، في ماتش الدور الأول.
الزمالك سنتر، والكورة راحت لـ سعيد الجدي، حسب ما أنا فاكر، بس لي واحد صاحبي مصمم إنه مجدي شلبي، ما علينا، المهم، إنها في الناحية الشمال (اليمين بتاعة الأهلي)، لعبها بـ العرض، راح عامر جابها جون في نفسه.
3
دقايق بالظبط، الكورة هجمة لـ الأهلي في الناحية اليمين (الشمال بتاعة الزمالك)، اتلعبت بـ العرض، عامر جاب التعادل، وخلص الماتش كده.
كان ساعتها الجوهري المدير الفني لـ الأهلي، وواضح إن التعليمات كانت كده، أي كورة عرضية من اليمين حطها جون، بس الجوهري ما قالوش لـ أنهي فرقة، فـ هو حطها فـ الاتنين من باب الاحتياط.