بيت معمول بالحب ..قصيدة من "دبدوشكا" محمود رضوان
بصي بقى في عيني
إملينى حنان من إللى ف عنيكي
في عنيكي كل الحنان
إللى نزل ع الارض
أنا بعيد أوى.. بس قريب جداً
ماتبعديش إنتي أكتر..وكفاية كتر البعد
عرفتك بس من دمعة
ومن حبة وجع في القلب
وخفت عليكى كل الخوف
كأنك بنتى أو أمي كأنك منى من دمي
كأنى بأعرفك من قبل الميلاد والشوف
مش عارف أختصر بعد المسافات اللي بيننا
مش عارف اجيلك ولا أسمع صوتك بيغني
“في يوم وليلة دوقنا حلاوة الحب كله في يوم وليلة”
الدنيا كل الدنيا ف عنيكي
والدموع كل الدموع في عنيا
ارجوكي خليكي
أنا جايلك
أنا استاهل كل العطف
وكل الحب وكل الخوف
أنا برضه سنين تايه قبلك
بس لقيتك يعنى ماتهوتش
مستنيكى
نشرب شاى معمول بالحب
من إيدك ..من قلبك
من سكر دايب مع شهد ملامحك
نفسي أسمع منك
أغنية لوردة بلحن بليغ
عملوها فى بيت معمول بالحب
عملوها عشان توصل قلبك
وأسمعها أنا منك فاتحب
وأقول
“آه لو قابلتك من زمان كانت حياتى اتغيرت”
أنا كائن محظوظ إنى عرفتك
أنا شبهك جدا جدا
أنا منك
أنا واقف على باب أوضتك
شايل ورد وشايل حب وشايل ود
أنا واقف مستنى خروجك
أنا والبحر ..أنا والشط
وعرايس قاعدة بتحلم فى دولابك
كلنا “ملهوف” يسمع صوتك
أنا هفضل واقف على بابك
بدعيلك وانا عارف إنك دعيالى
أنا مش شاعر أنا بكتب حب
أنا آخر واحد داق الحب وطعم الحب
أنا طفلك غنيلى بحب
“الشمس هتطلع لما حبيبي يفتح عينه”
وإنتي الشمس
وأنا فتحت عنيا خلاص
نفسي أشوف
أنا كائن معمول بالحب
وإنتي الحب في زمن الخوف.
اقـرأ أيـضـًا:
يسري الفخراني: “الترافيك”سبب الكراهية وبرامج السعادة “وقتية”
“الإذاعة” ملاذ المحبين.. ربع قرن من الحب
وجوه إعلامية لا ننصح بمشاهدتها في عيد الحب
هؤلاء لن يقدموا الورد في فلانتين 2016 !
.
تابعونا علي الفيس بوك من هنا
تابعونا علي تويتر من هنا