تامر أمين مهاجماً "الرقابة": الأفلام فيها مليطة ولحم كتير
استنكر تامر أمين، مقدم برنامج “الحياة اليوم” موافقة هيئة الرقابة على المصنفات الفنية، على عرض فيلمين بعنوان “عبيله وإديله”، والفيلم الأخر “ورا مصنع الكراسي”، وذلك حسب المعلومات الواردة له من أحد المصادر داخل الرقابة على حد قوله، مضيفًا: “لو الفيلمين دول نزلوا في دور العرض فعلاً أنا هعترض، لأن مينفعش يكون فيه أفلام في السوق بالأسماء دي”.
وتابع “أمين” خلال تقديمه حلقة اليوم، الجمعة من برنامجه الذي يُعرض على قناة الحياة: “في حالة من حالات الاستهبال، والمسئولين عن الرقابة واضح انهم فاهمين الحرية غلط، لأن الحرية هي إني لا أقمع الأفكار السياسية أو أمنع الإسقاطات، لكن ماينفعش اني اساهم في انحطاط الذوق العام”.
واستطرد موجهاً حديثه للرقابة: “انتوا بتشتغلوا إيه بالظبط؟، إذا كان المليطة واللحم الكتير اللي في الأفلام وبتسيبوهم يظهروا، وألفاظ إباحية وإسقاطات خارجة وعناوين منحطة بتسيبوها تطلع، أومال بتراقبوا على إيه بقى؟”
واختتم أمين قائلاً: “لو السينما بتاعتنا هتبقى سينما قبيحة تبقى مصيبة سودة، انتوا دوركم تراقبوا الحياء والأخلاق العامة ولو مش هتعرفوا تعملوا كده يبقوا تقفلوها أحسن”.
https://www.youtube.com/watch?v=NS3KuYnyvgE