مؤمن المحمدي يكتب: بالمناسبة (20) 2005 أرقام غير قابلة للكسر
أسمع أنا اسم طلائع الجيش من هنا، أفتكر موسم 2004/ 2005 من هنا، لـ إن ده أول موسم لـ الجيش في الدوري، وأعظم موسم لـ أي فريق في أي دوري على وجه البسيطة، وأنا أقصد ما أقول حرفيا ورقميا وبـ كل المعاني.
الأرقام اللي الأهلي عملها في الموسم المذكور أرقام إعجازية، وفيه منها أرقام غير قابلة لـ الكسر، مش لـ إنها صعبة، لأ، لـ إنها مستحيلة.
مثلا مثلا يعني، مفيش فريق في العالم كله أنهى الدوري في بلده، بـ نسبة فوز في المباريات الخارجية، 100%، أيوه 100%، يعني الأهلي سنتها كسب كل المباريات اللي لعبها خارج أرضه، ولـ التاريخ، علشان الأيال تحفظ، ناخدهم بـ ترتيب الدوري
سنتها في نهاية الموسم:
التاني: إنبي 2/1
التالت: حرس الحدود 2/1
الرابع: الإسماعيلي 6/ صفر،
الخامس: أسمنت السويس 3/ صفر
السادس: الزمالك 4/2
السابع: المصري 2/ صفر
التامن: المحلة 2/1
التاسع: الاتحاد السكندري 4/ صفر
العاشر: طلائع الجيش 3/1
الـ 11: أسمنت أسيوط 3/1
الـ 12: بلدية المحلة 2/1
الـ 13: الترسانة 3/ صفر
الـ 14: المنصورة 1/ صفر
كمان، فارق النقاط بين الأهلي، وصاحب المركز التاني كان 31 نقطة، في دوري كله على بعضه 26 ماتش، والفارق بينه وبين الزمالك 38 نقطة (أكتر من الضعف)، الدوري اتحسم رسميا في يناير، أيوه، في يناير كان الأهلي بطل الدوري، وقبل نهايته بـ سبع أسابيع كاملة، يعني كان فيه سبع ماتشات لـ الأهلي تحصيل حاصل، ومع ذلك كسبنا منهم ستة، واتعادلنا ماتش إنبي على أرضنا.
الموسم ده مكنش كورة قدم يا جماعة، كان أي حاجة تانية، الأهلي سجل 59 هدف، وأقرب فريق له (إنبي) سجل 43. واستقبل 13 هدف، وأقرب فريق (الإسماعيلي) كان 25، فارق الأهداف كان +46، واللي بعده (إنبي) +17، إنتو متخيلين الموضوع كان عامل ازاي؟
الموسم ده طبعا اتقال فيه أساطير من جماهير الفرق المنافسة، من نوعية إن الأهلي اشترى نادي الإسماعيلي، أو إن عصام عبد المنعم ظبط الموسم لـ الأهلي، أو ضربة جزاء أبو تريكة قصاد حرس الحدود، أو الوقت الضايع كان كتير في ماتش مش عارف مين، أو رمية تماس غير صحيحة تسببت في هدف في ماتش مش عارف إيه، وخلينا ناخدها حاجة حاجة كلما تيسر، بس خلينا نبدأ بت حاجة تخص الموسم نفسه، وهي عصام عبد المنعم.
قالوا إن عصام عمل الانتقالات الشتوية مخصوص علشان الأهلي يقدر يستقدم اللاعيبة اللي هو عايزها في نص الموسم.
طيب، يا جماعة، أظن بعد 12 سنة من تطبيق الانتقالات الشتوية، عرفنا إن دي حاجة حاصلة في العالم كله، ماهيش اختراع أهلاوي ولا حتى مصري، لكن الموضوع ده فيه مفاجأة لطيفة، إنه مش عصام عبد المنعم اللي عمل الانتقالات الشتوية، فضلا
عن إن الأهلي ما استفادش منها، وتعالى نراجع:
عصام تولى المهمة بـ التعيين يوم 15 مايو 2004، التعيين ده مالوش علاقة لا بـ أهلي ولا بـ زمالك حضرتك، ده له علاقة بـ صفر المونديال، لـ إن اليوم ده، هو اللي أعلنت فيه نتيجة تنظيم المونديال، وخدنا الصفر المتين، فـ أقالوا رئيس الاتحاد، اللي كان وقتها سمير زاهر، وجابوا عصام عبد المنعم.
الانتقالات الشتوية بقى بدأت من يناير 2004، يعني اللي أقرها كان سمير زاهر مش عصام عبد المنعم، ولو فاكرين، دي الانتقالات اللي راح فيها تريكة من الترسانة لـ الأهلي، والأهلي خسر موسم 2004، وكان خلاص بره المنافسة في يناير، ما فرقتش يعني، يروح يناير ولا آخر الموسم.
أما الموسم العظيم بتاع 2005، فـ الأهلي ماجابش فيه حد في يناير، على ما أذكر يعني، ثم إنه يعني انتقالات يناير دي كانت لـ الأهلي بس؟ عجايب
عموما، لسه فيه كلام كتير عن الدعاوى بـ الموسم ده، هـ نشوفها واحدة واحدة
وإن شاء الله هـ نكسب.