هشام المياني: كيف تصبح مقربًا من أصحاب السلطة؟
– في المقال اللي فات قلنالك إزاى تخلي رئيس تحريرك يحبك.. وانت التزمت بالنصايح وثبت قدميك في الجرنال.
– دلوقتي بقى مش هتفضل مجرد صحفي وخلاص.. لازم تقب وتبقى إعلامي وكمان مقرب من السلطة.
– بص يا سيدي في الجرنال فكك من قصة الشغل المهني والأخبار والتحقيقات وبتاع.. دي ما بتأكلش عيش.
– اكتب مقال.. مش مهم تكتب حاجة مفهومة ولا مفيدة.. اكتب وبس.. المهم يتلطع اسمك بالبنط العريض فلان الفلاني يكتب.
– خلي أصحابك يشيروا المقال بتاعك علي “الفيسبوك” ويكتبوا عنه “واااو.. برافو يا فلان.. يسلم قلمك يا علان” وهم أصلا مش فاهمين حاجة من اللي انت كاتبه.
– ما تخافش هم مش هيحرجوك ويقولولك مقالك وحش، إحنا في مهنة تحكمها المجاملات والضحكة الصفرا.. وانت بعد شوية هتصدق انك فعلا بتكتب حلو.
– خلاص كده انت عملتلك كام مقال واتحسبت في ذمرة كتاب المقالات.. ابدأ بقى اشتم في الحكومة وفي النظام واعمل نفسك بتكشف كوارث مع إنك ناقلها من تحقيقات صحفية قديمة.
– ما تقلقش.. محدش هياخد باله إنك سارق المعلومات اللي بتكشف بيها عن الكوارث.. لأن محدش خد باله من أصحابها اللي نشروها قبلك عشان هم نشروها بهدوء ومهنية وبدون فرقعة.
– سيادتك بقى ما تغلطش غلطتهم لازم تعمل عناوين تشد وفرقعة وحركات عشان برامج التوك شو تاخد بالها منك.
– ولازم في كل مقال تخبط في الحكومة والنظام وتهاجم أوعى تنافق أو تشتغل بموضوعية لأنهم كده مش هياخدوا بالهم منك.
– شوية وهتلاقي البرامج بتستضيفك كل ما تبقى محتاجة حد يسخن الحلقة أو يزعق وبتاع.
– أصحاب السلطة هيقلقوا منك.. هيبدأوا يتواصلوا معاك وهتم دعوتك للقاءات كبار رجال الدولة.
– لازم بقى تستغل اللقاءات دي وتكتب عنها وتنشر صورك وانت مع رجال السلطة عشان كل مسئول يخاف منك ويعملك حساب على أساس إنك واصل.
– كده انت ضمنت كل الطرق تبقى مفتوحة قدامك.. وهتكون إعلامي وصاحب برنامج تليفزيوني في أقرب وقت عشان توسع نشاطك في التقرب والاستفادة من السلطة.
– خد بالك انت دلوقتي مقرب من السلطة فهتبقى محسوب عليها فلازم تشكر في السلطة.. آاه سوري معلش.. نسيت إن من غير نصحيتي هتشكر لأنك خلاص حققت اللي كنت بتهاجم عشانه!!
ملحوظة:
– يوجد كتاب مقالات وإعلاميين محترمين ومهنيين جدا محدش حاسس بيهم ولا ملتفت لهم عشان ما بيزعقوش ومش بتوع 3 ورقات… وكمان فيه مقربين من السلطة ما بيتاجروش بقربهم منها مع إن تأثيرهم عليها قد يكون أكبر.
لمتابعتنا عبر فيس بوك اضغط هنا
اقرأ أيضًا:
المياني يشكو النجار أمام نقابة الصحفيين