مؤمن المحمدي يكتب: بالمناسبة (23) من محمد صديق لـ جمال عبد الحميد
أول هدف أحرزه الأهلي في بتروجيت، كان موسم 2006/ 2007، في ماتش الدور الأول، وانتهى 4/ صفر، مين اللاعب اللي سجل الهدف ده؟ محمد صديق.
يمكن كتير من الجمهور ما يفتكروش، والشباب اللي عندهم دلوقتي من 15 لـ 20 سنة، كانوا صغيرين أوي لما صديق لعب لـ الأهلي، وهو ما كانش لاعب مؤثر في الفترة اللي لعبها، منين جه صديق؟ من الزمالك.
أهي دي حاجة غريبة، ومالهاش عندي تفسير، ليه اللاعيبة اللي بـ ييجيوا من الزمالك لـ الأهلي بـ يبقوا غالبا زي أخونا صديق، في حين اللاعيبة اللي بـ يروحوا من الأهلي لـ الزمالك كتير منهم بـ يعمل فارق كبير؟
أقول لك الأول معلومة:
ولا لاعب كان في الزمالك وسجل فـ الأهلي، ولما راح الأهلي رجع سجل في الزمالك، بـ يتكلموا عن واحد عملها اسمه مصطفى كامل طه، بس ده من أيام الجنيه الجبس، كان بـ يلعب أساسا قبل الدوري ما يبدأ بـ زمان، غير الكابتن مصطفى ده، ولا لاعب عملها.
حتى إينو ومؤمن زكريا، اللي جم من الزمالك، وسجلوا فيهم، مكنوش سجلوا فينا قبل ما ييجوا.
العكس تماما، فيه أكتر من لاعب سجل لنا الأول، وبعدين أول ما راح يسجل فينا على طول، زي جمال عبد الحميد وحسام حسن وأحمد حسن.
أول لاعب اتنقل في العصر الحديث، من التمانينات وإنت طالع، كان جمال عبد الحميد، كان آخر موسم ليه مع الأهلي 1981/ 1982، وفيه أكتر من رواية لـ حدوتة الانتقال، بس المؤكد إنه تعرض لـ إصابة أواخر موسم 1982، الإصابة كانت في التمرين، وكان المفروض ما يلعبش كورة تاني.
اللي تعهد جمال عبد الحميد كان محمود معروف، واحد من أكبر الزمالكوية في التاريخ، كان بـ ياخده، ويطلع بيه المقطم (إيه الجملة دي؟ شكلها أبيح، بس والله ما كنت أقصدها كده، ولا دي سكتي، ما علينا).
معروف كان بـ ياخد جمال عبد الحميد المقطم، يعمل له تدريبات مخصوصة، واتقدم تا را را، اتقدم تا را را. والحقيقة إن إرادة عبد الحميد كانت فولاذية، ومحدش كان مصدق إنه هـ يعملها، بـ ما في ذلك إدارة نادي الزمالك، بس هو عملها، وعلى بداية موسم 1983/ 1984، كان قدر يرجع يلعب، وطبعا اتقيد في الزمالك، وسنتها الزمالك خد أول دوري ليه بعد غياب ست سنين.
مواسم 1984، 1985، 1986، جمال عبد الحميد ما سجلش مع الزمالك في الأهلي، وإن كان عملها مرتين، بس المرة الأولى 1984/ 1985، الحكم الإيطالي لغى الهدف بـ داعي التسلل، مع إنه كان هدف صحيح 100%، (وعلشان بس الزياط، لغى كمان هدف صحيح 1000% لـ علاء ميهوب في نفس الماتش، المساعد باين كان واكل ملوخية).
المرة التانية كانت موسم 85/ 86، بس كان ماتش ودي، “في حب مصر”، بعد أحداث الأمن المركزي، قبل بطولة أفريقيا، ولذلك مش محسوب.
في موسم 86/ 87، كان جمال عبد الحميد على موعد مع أول هدف، لأ، أول هدفين في الأهلي، هدف في ماتش الدور الأول، وكان هدف فوز الزمالك على الأهلي، ويوميها حمادة صدقي مدافع الأهلي القادم من المنيا، زهق من عبد الحميد اللي لعب ماتش من أميز ماتشات عمره، فـ حمادة رزع جمال قلم، خد بـ سببه كارت أحمر وخرج.
ماتش الدور التاني، جمال عبد الحميد مارس هوايته، وسجل هدف نسخة طبق الأصل من هدفه في ماتش “حب مصر”، بس لـ حظه الوحش، الأهلي سجل في الماتش ده هدفين، وكسبنا 2/1، الهدفين سجلهم أيمن شوقي، اللي هـ يلعب بعدين في الزمالك
بس دي حكاية تانية، خليها لـ وقتها.