إنجي لطفي تكتب: رسائل "سانتا كلوز " للإعلام في 2015
أيام قليلة.. وينتهي عام 2014 بما يحمله من إيجابيات وسلبيات وإن كانت الكفة الأخيرة هي التي غلبت علي معظم مقدمي برامج التوك شو لما كان فيها من سباب وشتائم فضلا عن تحولها لمنابر لتصفية الحسابات والتلفظ بألفاظ خارجة.
نتمني أن يتعلم الإعلام من أخطائه في العام الماضي حتي لايكررها في عامه الجديد 2015، وهناك عدد من الرسائل يريد سانتا كلوزا الشخصية الشهيرة المعروفة بـ “بابا نويل” توجيهها لمجموعة من الإعلاميين وهي:
ريهام سعيد: بطلي تخوفي الناس والأطفال.. ده مش إعلام ولا دي رسالة.
تامر أمين: بطل تشكر علي الهواء زي انشراح.
أحمد موسي: ياتشغل مذيع بمايرضي الله.. ياتفضل في جهاز الأمن.
وائل الإبراشي: استقر علي مكان.. وكفاياك مناكفة.
عمرو أديب: مفيش داعي تقلع ملط.. الشتاء دخل كده ولكده.
باسم يوسف: ياريت ماكان خليفة نزل بالتتر.. وحشنا “البرنامج”.
أكرم حسني: عملت مجهود محدش يقدر ينكره.. بس مش هتعرف تعوض غياب اللي قبلك.
ريم ماجد: هتفضلي جدعة وبميت راجل.
دينا عبد الرحمن: صوت الحق عندك عالي.. ياوشوش غالية واحشانا.
مني الشاذلي: فينك محدش شايفاك ليه.. منتظرين الأقوي.
أسامه منير: ربنا يقدرك علي حل مشاكل البنات.. السياسة مش ليك.. وتجربة المحور خير دليل.
هالة سرحان: حلقة واحدة في روتانا لا تكفي.
معتز الدمرداش: أوعي تروح في أي حته.
ليليان داود: أوعي ترجعي بلدك.. مهنيتك لاخلاف عليها.
جابر القرموطي: قدرت تجمع بين الإعلام والتمثيل.. عملت حالة مختلفة .. براااافو.
توفيق عكاشة: إيه علاقة دكر البط بالإعلام؟؟؟؟.
يسري فودة: طيب الله أوقاتك. ياريت توسع صدرك.
مني العراقي: طلعي المستخبي.. طالما ضميرك صاحي.
عمرو عبد الحميد: طلعت ابن نكته.. بس النظارة كانت مخبية.
ريهام السهلي: إنت فين ياريهاااااااام؟
عماد أديب: ارجع بقي.. علي غرار كلمات المطرب مصطفي كامل.
سيد علي: ياتري المرة دي أنت ابن المشروع.. إيه؟